النيابة العامة ببرشيد فضحات مفبركي فيديو مرشح سيدي رحال الشاطئ.. 1500 درهم عطاها مرشح استقلالي باش يطيح "الفيدور" ف جريمة إفساد العملية الانتخابية بالمال

فرشات تحقيقات الدرك الملكي، استقلالي مرشح في الدائرة 4 بجماعة سيدي رحال الشاطئ التابعة لعمالة برشيد، وكشف الاستماع إلى امرأة وراجلها، أن الفيديو مفبرك، والسيناريو ديالو خطط ليه المرشح الاستقلالي، وعطا الفلوس باش يصيدو ليه الخصم، لي فات كان رئيس جماعة، حيت خايف لا يخلق المشاكيل ويعرقل أطماع الدركي السابق في حصوله على الرئاسة.
وأمرت نائبة وكيل الملك ببرشيد البارح الخميس بعد ما تفرش كلشي وتهرسات الخطة الجهنمية، بتعميق البحث ومعاينة صفحة فيسبوكية نشرات الفيديو، وإجراء أبحاث تقنية قد تمتد إلى تحديد الأماكن.
وفي التقديم لي كان البارح الخميس، جاو مجموعة ديال الاستقلاليين ، وضمنهم المشرح للرئاسة، وكانوا معيقين بزاف بحال إلى زعما كيقلبو على تدخلات باش يعتقو الدركي السابق اللي نجح في الانتخابات وهاد القضية تقدر تطيحو.
https://fb.watch/7QuAa5jQ0Z/
تفاصيل القضية من بعد البحث في الشريط، أن المرأة وراجلها اتفقوا مع مرشح الميزان، باش يمشيو عند السيد الملقب ب"الفيدور"، واختارهم واخا هما ماشي فالدائرة ، حيت ولدهم سبق ليه كان خدام عندو ومهلي فيه، وعرف بلي الكمين غادي ينجح. الاستقلالي عطاهم بورطابل ورسم السناريو على أساس طلب مساعدة، وفعلا مشاو عندو وطلبوه على ولدهم وعلى الظروف الصعيبة ديالهم، وعطاهم شي بركة، وقالت ليه المرأة عبارة باش تطيحو، لكن هو رفض، حيت قالت ليه غادي نجيب ليك خمسة الأصوات، قال ليها هو لا هاد البركة عطيتها ليك بلا انتخالبات وبلا تصويت.
والاستقلالي كان واعد المرأة وراجلها بلي مغاديش يخرج الفيديو داكشي علاش داو ليه التليفون، وهو في الحملة، وخداه منهم وصيفطهم عند الكاتبة وعطاتهم 1500 درهم، مقابل هاد السيناريو.
من بعد بان الفيديو في موقع فيسبوكي متخصص في السب والقذف واستهداف المرشحين، وملي شافو راجل المرا غوت "وناري دارها بيا"، وذكر اسم الاستقلالي، على حساب تصريحات المرا.
المشكوك فيه الاستقلالي واعدهم باش مغاديش يخرج الفيديو وغايحتافظ بيه لغرض آخر، لكن خرج الفيديو وشوه المرا اللي بانت فيه، على حساب تصريحات راجلها.
المهم المرا وراجلها فرشو كلشي للجدارميا وللنيابة العامة.
الملف كان خاصو يتحال على التحقيق ويتاخذ قرار الاعتقال حيت المشكوك فيه خطير، راه فبرك قصة باش يطيح صاحبو ويشوه العملية الديمقراطية، والناس خايفين من التدخلات حيت المتهم كان جدارمي سابق وعندو مع المساطر والقوالب ديال الإنكار، ودايرين بيه أصحاب نفوذ منعم اللي كيسكن ببرشيد.
دابا السؤال هو واش وكيل الملك غايعطي درس للمتلاعبين بالعملية الانتخابية ولا غايخليها تبرد وتنسى باش تتعاود مرة خرى؟.