سكوب. وحتى لكلاب طمعو فيهم. فضيحة ما طيحش ليكم على البال فجرها الحموشي فعش الدبابير: الكلاب البوليسية فهاد المدن اللي كتسوى لملاين لقاها مريضة ومبوؤسة وجيعانة وفبلاصتها كلاب المسؤولين فالبوليس مبرعة وها اللي تقرر باش عمر داوود ما يعاود

ما يمكنش يصدق شي عاقل فهاد لبلاد باللي كاين شي مسؤولين امنيين توصل بيهم اللا انسانية يعذبو كلاب ويتعداو عليها. هاد الفرشة وقعات هاد الايام، فحسب مصدر ل"كود" فان عبد اللطيف الحموشي المدير العام للمديرية العامة للامن الوطني رسل لجان تفتيش لوجدة ولطنجة. هاد اللجنة ما مشاتش تشوف الاداء الامني ولا شي حاجة اخرى. مصدر "كود" قال ان مهمتها "تشوف وضعية الكلاب المتخصصة اللي كاينة فكل ولاية امن. منطقيا وحتى اداريا كل ولاية للامن فالمغرب عندهم كلاب متدربة غالية بزاف ومتخصصة فالمتفجرات وكتخدم فالارهاب وفالمخدرات. وفكل بلاصة فيها هاد النوعية ديال لكلاب الخاصة جدا كاين مصلحة كتشرف على ايواءهم وماكلتهم والتطبيب ديالهم. مثلا كل كلب كلب ساكن بوحدو فهاديك اللي كيسميوها المشارقة "الوجار" =دار الكلب=
حسب مصدر "كود" فان الحموشي اكتشف العجب العجاب فوجدة اللي زارتها اول لجنة تفتيش وحشومة حتى تكال: مسؤولين امنيين حاليين وسابقين جابو كلابهم الخاصة اللي كيصيدو بها ولا مربيينها وحطوها فبلاصة الكلاب الامنية التابعة للمديرية العامة للامن الوطني. جمعو الكلاب المتدربة على المتفجرات فبلاصة وحدة مكرفصة ودارو كلابهم فهاداك "الوجار". الحاصول برعو كلابهم ووكلوهم بفلوس الدولة والنتيجة "الكلاب المتخصصة فالمتفجرات اللي محتاجها المغرب ديما وخاصها تكون واجدة مريضة وضعيفة وكتعيش ظروف مزرية بزاف" تقول مصادر "كود".
اللجنة باش وصلات لطنجة اكتشافتو نفس الفيلم تقول مصادر "كود"٬ "كلاب المسؤولين الامنيين الخاصة دايرينها فبلاصة الكلاب المتخصصة في المتفجرات اللي حتى هي كتعيش ظروف مزرية ولو انها ماشي بحال وضعية الكلاب فوجدة". دابا بحال هاد العقلية اش غادي يدير ليهم الحموشي. واش طمعو حتى فالكلاب وماشي اي كلاب وجايبين كلب شخصي ديالهم ايلى غلى غلى ما يفوتش 6 الاف درهم بينما هاد الكلاب المتدربة غالية بزاف بزاف وخاصها عناية خاصة بزاف.
حسب مصدر "كود" فان الحموشي وبالاضافة الى العقاب الاداري اللي كيناسب تصرفهم٬ بدا بقرار ذكي بزاف "قبل ما يهزو كلابهم ويرجعو الكلاب المتدربة لبلاصتهم خلصو اولا كلشي اللي كلاوه من فلوس الدولة وطيلة هاد السنوات". يعني الاداء عاد العقاب.