عصابة “حمزة مون بيبي” منوضة الشياط في عائلة باطمة.. وراجلها دخل فالموضوع ودنيا: لي ماعندو سيدو عندو لالاه

قضية العصابة ديال كونط “حمزة مون بيبي” منوضة الشياط بعدما اعتاقلو البوليس مول الحساب الحقيقي، ودابا كيحققو معاه، ومع بزاف ديال المشاهير لي مشكوك أنهم عندهم علاقة بيه.
ومن ديما الاتهامات كانت موجهة لدنيا باطمة على أنها هي وصحاباتها دايرين هادشي باش يضربو به الاعداء ويشوهو ويفرشو لي بغاو لكن دنيا ديما نفات هادشي.
البارح وبعدما كترات الهضرة دارت لايف دوات فيها على هاد الاشاعات وقالت أنها ماعندها علاقة بهاد الكونط، وماشدوها لا هي لا ختها فالحبس، وماعيطوش ليها البوليس وقالت “ماعندكم ماتشدو عليا.. ولي ماعندو سيدو عندو لالاه غير ماتبقاوش تخلعو الناس علينا”.
راجلها ومدير اعمالها البحريني محمد الترك حتى هو دار لايف في انستكرام وقال ان مراتو وختها ماعندهم حتى علاقة بموضوع الكونط واخا ديما كان كيشكرها وكانت دنيا كتغني ليه مع الدقة المراكشية ملي كتكون ناشطة ودارت ليه جتى ديديكاس.
وباقي لحد الان الكونط مامعروفش شكون موراه ولا شكون مول الفكرة، لكن البوليس دارو خدمتهم وسدوه ودابا التحقيقات غادي تبين الحقيقة.