القصة الكاملة ديال “حمزة مون بيبي”. ها عشرانو وها القائمة السوداء لي كان متخصص فيهم -فيديوهات

هادي عام خرج كونط سميتو “حمزة مون بيبي” التخصص ديالو التبركيك والهضرة ديال الكولوارات والفرشة ديال الجماعات لي كتكون بين الفنانين وهوما ناشطين وفرحانين. في عام قدر هاد السيد (او سيدة أو المجموعة كاع) يدير بلاصتو في مواقع التواصل ويولي حساب عندو ملايين ديال المتابعين لي نهار ومطال وهوما كيتسناو شكون الضحية ولا الموضوع السخون لي غادي ينزل.
الكونط ضر بنادم في راسو، وديما السؤال داير على شكون هو وعلاش كيدير هادشي وشنو الرباح ديالو هو من هاد الشوهة لي كيدير للناس، خصوصا المشاهير الكبار. ولعل أكبر وأكثر متضررة كلات الدق مزيان في هادشي هي المغربية مريم سعيد لي كان حط ليها الباسبور ديالها وتصاورها بلباس سيكسي قبل ما تشهر. هاد التصاور تحطو في عز الحملة لي كان داير سيمو بنبشير على مريم سعيد ولي بسببها قناة mbc جرات عليها، وداباجاية عام باش السيدة مابقا بان ليها لا حس لا أثر.
الا مشينا غير بالخشيبات غادي نلقاو أن قضية مريم سعيد بداها سيمو بنبشير لي خرج كيدوي على قصة زواجها من صاحبو المغربي كريم ظريف لي كان فركش العرس قبل يوماين وقال أن القضية “اخلاقية”، ومن تما بدات الحرب وتحطو تصاور مريم وناضت الروينة.
في هاد الكونط لي مولاه حسب تحقيق البوليس ولد أكادير عندو 23 عام كيقرا فكلية العلوم الاقتصادية والقانونية جامعة بن زهر اكادير، كانو عندو شخصيات مقدسة وشخصيات كيدگدگهوم، المقدسين عندو هنا دنيا باطمة وسيمو بنبشير لي فميريكان وسكينة كلامور في مراكش وزيد عليهم عيشة عياش لي في دبي ونوفل موسى لي مشهور بصوفيا. أي حاجة كانت فيها باطمة كان كيشكرها ويدعمها واخر قضية هي ديال كوبل مراكش ياسين لي من ذوي الاحتياجات الخاصة، ولي جمعو ليه من الكونط في سناب الفلوس ودارو ليه العرس. زيد على هادشي فينما تكون باطمة فشي مجمع كتدير ل”حمزة مون بيبي” ديديكاس، وهادشي لي خلاها ديما في مرمى الشبهات.
القائمة السوداء ديال هاد الكونط هوما نفس الاشخاص لي منوضين الحرب مع باطمة وفي المقدمة جواد قنانة لي كيدير الماكياج ولي اليوتوب شاهد على المعاطيات ديالو معاها، وسعيدة شرف لي قالباها صباط حتى هي مع دنيا، وواحد السيدة معروفة بسلطانة ولي كانت ضاربات مع دنيا وختها ابتسام والقضية فيها الخيانة والروينة الكحلة، زيد عليهم يوسف الزروالي لي حتى هو ديما كيعاير باطمة ولي الكونط كيسبو ليل ونهار، ومؤخرا ناض حتى لراجل لبنى ابيضار وقال عليه نصاب وجاب وثائق باش يتبث هدرتو.
هادشي كامل ماجبدناهش من راسنا وماعندنا مشكل لا مع دينيا باطمة ولا سعيدة شرف ولا حتى واحد، ولكن الكلاخ والغباء ديال الناس كيخليهم يفرشو راسهم بوحدهم. ودابا ها القضية وصلات للبوليس والتحقيقات خدامين والسيد مشدود فالحبس، وفي الاخير كل واحد غادي يخلص ثمن فعايلو.