اش كيدير ايت منا بجلابيتو وسط سطاد دونور مع لاربيط فماتش فرقتو ضد الواك؟ ها جوابو ل"كود" وها ردو على فيديوات داروها رجاويون كيشدو فيه على قرايتو لمداخلتو فالبرلمان

صورة مستفزة. هشام ايت منة رئيس المكتب المديري لنادي شباب المحمدية ليلة الاحد اللي فات 10 ابريل فماتش الوداد البيضاوي ضد شباب المحمدية عن ثمن نهاية كاس العرش٬ دخل للتيران بعد ما صفر لاربيط رضوان جيد على نهاية الماتش.
دخل لابس جلابيتو. بزاف دار مقارنة بين هاد الصورة وبين ايام القياد اللي كان كيتحكمو فالكورة قبل سنوات كثيرة.
"كود" سولات ايت منة على اش دخلو كرئيس للمكتب المديري للنادي بعد استقالتو من فرع النادي فكرة القدم٬ فرد باللي هاد الشي ما فيه والو "كنعرف الحكم جيد. دخلت بعد ما صفر النهاية. سلمت عليه وهدرت معاه على الصفرا اللي خداها لعاب ديالنا غير حقاش قال ليه شوف الفار راه پيلانتي. وباش شافو علن علي البيلانتي خلي الصفرا للعاب".
ايت منة قال ل"كود" باللي ماشي اول مرة كيدخل يسلم على الحكام بعد نهاية الماتش.
ايت منة كان وسط التيران. مشى عند جمهور فرقتو. دار تماك.
قبل هاد الشي كان تصريحو ل"راديو مارس" على الاشهار والراجا نوض الصداع. ايت منة شد فالرجاويين وقال ما معناه باللي ما كيعرفوش يجيبو الاشهار للنادي. طبعا كانت ردود ولكن اخطرها دارها رئيس سابق للنادي باش جاب دراري صغار كيقراو فالثالث والرابع والخامس وعطاهم خطاب اللي كان قراه ايت منة فالبرلمان علي السياسة الخارجية. كلشي التلاميذ قراوه مزيان وفاخر الفيديو جابو كيفاش قراه ايت منة والاخطاء اللي دارت.
بالنسبة لايت منة ل"كود" عندو روح رياضية وباش انتقد الخضرا كان عارف باللي غادي يهاجموه باي وسيلة.