البلطجية طغاو فكلية الحقوق ديال سطات والعميدة خاصها تراسل الأمن باش يحمي المؤسسة والأساتذة كيتسناو مسلسل الإصلاح

العميدة الجديدة حسنة كجي دوزات پاساسيون واعرة، وبانت حسب مصادر "گود" أنها مرا وقادة، السيدة مكونة علميا وإداريا وحتى سياسيا، وبينات من النهار اللول أنه ماكتخلعهاش التشويشات ديال بعض المحسوبين على الطلبة بحال المحاولات الفاشلة ديالهم فأنهم ينسفو حفل التنصيب ديالها نهار الخميس اللي فات، وبانو صغيورين قدام الحضور.
الموضوع بدا كيبسال ف"فايسبوك" وحتى وسط لافاك بحيث كيعيشو أساتذة كلية العلوم القانونية والسياسية فسطات الرعب بسباب رباعة ديال البلطجية كيترأسهم مول الفو كونط ومعاه بلطجي آخر جاي قاليك حتى هو ولى طالب ديال الدكتوراه وهو كون ما داك المستشار البرلماني عابد ومع ابتزاز "خدوج.ف" گاعما يحلم يتسجل فالدكتوراه اللي ولات سبة فسطات، بحال شي تدوينة ديالو ف"فايسبوك" كيهضر فيها على الصحافة وعلى سرية البحث.. تا سير قرا غا كتوبك آسي سرية البحث.
فالحقيقة هاد الوضع مابقاش كيعجب، "گود "تواصلت مع بزاف ديال الأساتذة اللي عبرو على الاستياء ديالهم من هاد الوضع اللي مابقاش كيبشر بالخير، فاش كتلقى طالب بلطجي كَالس فالپيفيت ديال الأساتذة ويكوموندي الماكلة وزايدها يسب ويعاير فالناس.
شي أستاذات وأساتذة قالو بللي غاديين يجتامعو مع العميدة حسنة كجي اللي جاية معولة تصلح الكلية. بغاو يجلسو معها على موضوع التبلطيج قبلما مايمشيو عند الرئيس بالنيابة جمال الزاهي اللي ضاربها بنعسة ومابغى يتگعد شوية يزير السمطة، ويوقف هاد الأشخاص عند حدهم حيت هادشي بصراحة بدا كيعيق بزاف والبسالة تجاوزات گاع الحدود.
حتى الأمن راه كيتسناو منو بزاف يتدخل ويأمن مجلس الكلية اللي خصو ياخذ قرارات حاسمة. اللي باغي يدير الفوضى خصو الطرد النهائي من الكلية، والأستاذ خصو ترجع ليه قيمتو وحتى الناس دياول النيابة العامة اللي كيمثلو المجتمع خصهم يديرو مجهودات كبيرة باش يوقفو هاد الفوضى.
المهم كيبان أنه قدما بقى هادشي مطول قدما الله يستر غادا تطيح شي روح ولا غتوقع شي مصيبة كبيرة في الكلية المذكورة.