فحفل حضرو ليه شخصيات جامعية من سطات وكازا والمحمدية.. تنصيب حسنة كجي بشكل رسمي عميدة ديال كلية الحقوق سطات

اليوم فالعشية كان يوم خاص عند حسنة كجي رئيسة شعبة القانون العام فكلية العلوم القانونية والاقتصادية والاجتماعية بعين الشق سابقا، اللي تعينات مؤخراً عميدة على كلية العلوم القانونية والسياسية فسطات، اللي عاشت زلزال الاعفاءات.
حسنة كانت ناشطة بين حبابها وصحابها فنهار تنصيبها بشكل رسمي.
وحضرات "گود" لهاد الحفل واللي عاينات الشخصيات اللي حضرات لهاد اللقاء منها عمداء ديال كليات بحال عين الشق وعين السبع والمحمدية وغيرها، مع تسجيل حضور الكاتب العام للعمالة اللي حضر فبلاصة العامل اللي ماجاش بسباب شي أغراض شخصية.
المهم حسنة كجي عميدة لكلية العلوم القانونية والسياسية بسطات قالت فتصريح ل"گود" أنها "فرحانة بهاد التكليف قبلما مايكون تشريف، وكنشكر حكومة جلالة الملك محمد السادس نصره الله اللي تاقت فيا".
ووضحات كجي في ددنفس التصريح أنها "جاية باش تخدم وتعاود تصلح هاد الكلية من بعد الهزات اللي ضرباتها"، معبرة على ضرورة تكثيف الجهود من الأساتذة والأطر الادارية باش هادشي كامل يكون مزيان وفصالح الجامعة اللي دازو فيها مؤخرا مجموعة من الفضايح.