قضية "الجنس مقابل النقط". مصرحات اتاهمو صحافي وبوليسية بفبركة كونڤيرساسيون جنسية ف2016.. إيوا وتصويرة القصارة تاهي صاوبوها ؟

ما زال مصادر موقع "گود" كتجيب الجديد فقضية محاكمة أساتذة "الجنس مقابل النقط" بسطات، حيث قال المصدر اللي كان داخل للجلسة على أن جوج ديال المصرحات، اللي هما الخواتات المشهورات في سطات واللي هما بنات واد زم و اللي كانو طايحات مع المتهمين (عبد الرحمان.م) أستاذ تاريخ الفكر السياسي المتابع في حالة إعتقال، و(محمد.ب) منسق ماستر المالية العامة، اللي سدوه ليه منين عطات ريحتو.
المصدر قال على أن المصرحات الخواتات "فدوى" و"سكينة" قالو قدام المحكمة بللي "صحافي وبوليسية كانو كيقراو معاهم هما اللي صاوبو وفبركو ديك المحادثة الجنسية الشهيرة اللي خرجات ف2016 واللي هي اللي وصلات لهادشي كامل اللي واقع دابا".
مصدر "گود" كيقول "واش فداك الوقت ديال 2016 كان يمكن تصايب محادثة؟ أنا ماكنعتقدش أنه كان كيتصايب داكشي فداك الوقت، ويلا كانت المحادثة تصايبات فعلاً، واش هاديك التصويرة اللي فيها وحدة منهم مع شي بنت أخرى ومعهم النص التحتاني ديال راجل، كاين معطيات كتقول على أنه منسق ماستر المالية العامة المغلق المتابع في حالة سراح بكفالة 50 ألف درهم، تاهي مصاوبة؟!".
هادشي، حسب المصدر ديال "گود"، "كيضحك بصح، حيت السيدة واخذة سيلفي لطابلة فيها البيرة والقطعة والگارو وباينة أنها قصارة وهي نيت كتهضر على المصان لمحمد بوجنون".
هادشي باين كذوب باش يتبراو من الكونڤيرساسيون ديالهم اللي فالأصل هي ديالهم مع طالبة سابقة وهي الآن ولات بوليسية اللي غدروها والكونڤيرساسيون خرجات من تلفونها هي، كيف قال مصدرنا، حيث أن الصحافي الشاهد جا لقى داكشي معلق فباب العمادة واستنكرو فحوارات صحفية ودار حلقية نضالية لأنهم قحمو ليه سميتو تما.