الاعلام الصبليوني هاجم على طريقة تدخل قوات المغرب فمليلية: كاين نفاق كبير مع المغرب كيفاش تقبل مدريد هاد التدخل العنيف ودفن الجثث بلا التعرف عليهم لا تحديد هوياتهم

نايضة بزاف فاسبانيا على احداث مليلية اللي مات فيها لحد الان 23 مهاجر غير شرعي كانو باغيين يقتاحمو الحدود الصبليونية الجمعة اللي فاتت. الاحزاب السياسية كلها من حكومية ومعارضة طالبة رئيس الحكومة يجي للبرلمان ويعطي تفسيرات. بوديموس حليف الحزب العمالي الاشتراكي وشريكو فالحكومة طالب بلجنة تقصي الحقائق فهاد الشي اللي وقع.
المحللون والاعلاميون فالقنوات الاخبارية والبرنامج الاخبارية فالقنوات العمومية او الخاصة٬ دايرين هجوم كبير على المغرب. كلهم كيهدرو على الاستعمال المفرط للعنف ضد المهاجرين وكيبينو فيديوات لبوليس كيضربو حراگة.
كاين اللي مشى حد مطالبة بلادو باش تشترط فالدعم المالي للمغرب بخصوص تدبير الهجرة غير الشرعية٬ باش القوات يكون تدخلها "انساني" وتجنب العنف وان اي عنف مستقبلا يوقفو علي الرباط كاع التمويلات لهاد الشي.
اعلاميون ومحللون هاد الصباح ف"لا اورا" =الساعة= استغربو دفن جثث القتلى 23 بلا التعرف عليهم بتحديد هويتهم. بلا ما يدار ليهم تشريح لمعرفة اسباب الوفاة. وهادو قالو باللي كاين نفاق كبير بزاف ضد المغرب.
رئيس الحكومة كان دافع علي المغرب باش قال باللي كيتألم مع عائلات الضحايا ولكن كيدعم المغرب فحربو ضد مافيات الهجرة ووزير داخليتو قال باللي حتى شي بلاد فالعالم ما تقبل اقتحام عنيف لحدودها.