اييه دفاعا على ماما فرنسا. كيفاش تقاطع منتجات بلاد فيها اكبر مغاربة الخارج ومشابكة بيناتنا بطريقة يستحيل شي حد يتخلى على لاخر ثم واش كاينة شي بلاد قادرة دير ڤيطو باش دافع على مغربية الصحرا وعلاش شي مغاربة كيدافعو على تركيا الداعمة للارهاب اللي كنتضررو منو

شي وحدين مغاربة فيهم اللي ولاءهم لتركيا ولقطر وللسعودية ماشي للمغرب وفيهم اللي كيدير السياسة٬ نايضين قال ليك نديرو مقاطعة للمنتجات الفرنسية. القضية مضحكة مبكية. فرانسا اللي وصلنا فعلاقتنا بيها لدرجة من التوحد ما مسبوقاش فعلاقاتنا بالخارج. حتى ايلى بغينا نقطعوها شي نهار ولا هي بغات تقطعها يستحيل. مشابكة بزاف بزاف.
هاد صحاب تركبا فالمغرب صحاب الداعم للداعشية رئيسها اردوگان ولاو ضد المغرب بوعي او بلا وعي. اليوم فالصباح قال الجينرال السابق للقوات المسلحة الفرنسية السابق دوڤيليي فحوار مع "بي ام اف تي ڤي" باللي تركيا دعمات جزء من الاسلام المتطرف وباللي ما بقاتش دولة لائكية".
دابا نرجعو للمقاطعة. نبداو من الامور الانسانية ذات التأثير الاقتصادي على المغرب. عاد ندوزو لتأثيرها على القضايا الجيو استراتيجية. نشوفو المغرب باش عايش. من مداخيل المغرب الاساسية تحويلات مغاربة العالم. عندنا خوتنا اللي مفرقين على كاع الدول فحدود 5 مليون نسمة. حنا اللي عايشين فالمغرب 35 مليون.
هاد 5 مليون نسبة كبيرة منهم فاوربا الغربية. ففرانسا كاينة رسميا مليون و300 الف نسمة. طبعا تقدر تكون شي ارقام ما محسوبينش. صحاب الهجرة السرية.
هادو راهم اول معين للمغرب بالعملة الصعبة. تحويلاتهم كتلعب دور كبير بزاف فالتوازنات الاقتصادية الكبرى فالبلاد. بالاضافة الى التحويلات هاديك 10 مليون سائح اللي كنفوحو بيها على ريوسها راه غادي يكون من فرانسا النص تقريبا.
ثم هادو من اصول مغربية واللي بقاو مغاربة اللي كيرسلو لفلوس٬ راهم فيهم اللي خدامين فالشركات اللي نايضين الاسلاميين باغيين يقاطعوها. فيهم اللي باطرونات وفيهم اللي مستخدمين بساط. حتى ايلى صدقات هاد المقاطعة وهادي بعيد بزاف٬ راه المتضرر هو انت. يمكن امك يمكن خالتك يمكن عمك او نسيبك. ولدو او بنتو كيرسلو ليه تحويلات من فرانسا باش يعيش.
يعني يستحيل تقاطع منتجات بلاد انت مستفيد منها.
ندوزو لنقطة وهي ان الشركات اللي باغي تقاطعها عندها فروع فالمغرب ومخدمة خوتك لمغاربة. هادي سنوات كان لقاء مع الباطرونا ديال فرانسا وقال مسؤولها انو من اصل 39 شركة كبيرة ففرانسا اللي فهاديك "كاك 40" كاينة 39 مستثمرة فالمغرب. يمكن اليوم وصلات ل40 شركة.
ندوزو للقضايا لكبيرة. راه فرانسا اللي باغي تقاطعها هي المحامي ديال المغرب فمجلس الامن الدولي. هي كعضو دائم من الاعضاء الخمس الوحيدة اللي قادرة تستعمل الڤيتو ديالها باش دافع على مغربية الصحراء. راها سبق وهددات بيها. واش تركيا ولا غيرها عمرها دافعات على الصحرا؟ ابدا. هي كتدعم التطرف والاسلام الراديكالي. كتضر الاقتصاد.
فرانسا محامي المغرب فالاتحاد الاوربي فمحافل دولية. طبعا كتكون فترات ازمة ومشاكل ولكن داخلة فالمشاكل اللي كتعتابر عائلية. ديما كاين اللي يقدر يدخل بخيط ابيض وكلشي يرجع كيف كان.
تركيا ديما فتاريخها كان عندها اطماع فالمغرب. راه فالقرن 16 قتلو السلطان السعدي محمد الشيخ بعد مكيدة داروها. ولادو ما رجعو راسو حتى اواخر هاد القرن. كانو ديما مصدر تهديد.
نساليو بنقطة اخيرة. هادوك اللي كيهدرو على الاسلام المغربي ماشي المشرقي خاصهم يعرفو ان فرانسا لعبات دور حاسم فيه. راه "السلطان" ليوطي منظر ليه فبداية القرن العشرين. حتى هاديك دخول المسجد لغير المسلمين اللي عندنا راه هو مولاها. شفتو التداخل فين وصل. حتى للدين اللي نايضين شي اسلاميين قبلهم وعقلهم مع قطر باغيين يقاطعو فرانسا. باغيين يقاطعو ماما فرنسا. حنا حتى الاسود ديالنا ما ولاوش كيخلعو شوية حتى استعنا لوليدات لمغاربة اللي تزادو وتكونو وتعلمو الكورة ففرانسا.