قال غادي يفركَع طيارة.. مراهق جاب الربحة بسباب الضحك الباسل – فيديو

قرقبو "لاكَوارديا سيفيل" فالصبليون على مراهق كان غير "ضاحك" فحسابو فموقع "سناب شات"، وقال بللي ناوي يفركَع طيارة، وهاد الضحك الباسل خرج عليه وبسبابو جاب الربحة.
جورنال "ديلي ميل" البريطاني، كشف أن المراهق عندو جنسية نكَليزية ومن أصول هندية، وكيلعب مزيان الشطرنج، وعرضات عليه جامعة كامبريدج المعروفة باش يلتاحق بيها حيت اعتابراتو نابغة.
هاد الولد سميتو أديتيا فيرما، وعندو 18 لعام، كتب فسناب شات: "غادي نفركَع هاد الطيارة.. أنا من طالبان"، وكان كيقصد طيارة تابعة لشركة "إيزي جيت" (EasyJet) اللي غادي فيها هو و5 من صحابو من لندن إلى جزيرة مينوركا الصبليونية.
وبسباب هاد الضحك البايخ ديال المراهق، قلعو جوج طيارات مقاتلات من طراز "إف 18" من قاعدة عسكرية فسرقسطة باش يمشيو مع طيارة "إيزي جيت"، هادشي اللي تسبب فخسائر للدولة.
وبداو فعلا جلسات هاد الولد فالمحكمة فالبدية ديال السيمانة وقال المدعي العام بللي "الضحك الباسل" ديال أديتيا كلف البلاد 100 ألف دولار مللي اضطرو يقلعو جوج طيارات حربيات باش يتعاملو مع هاد "التهديد".