#بالمغربية_تاعرابت: بنانة منوضاها فالفيس !

قربالة ناضت فالفيسبوك آمعلم، نهار الإثنين اللي فات، وكنا على شفا حفرة من إعلان الجهاد الافتراضي آسميتك...على بونت.
الناشطين والناشطات ديال فيسبوك وتويتر، شاط عليهم النشاط داك النهار، و طلقوا واحد الهاشتاغ سماوه يسقط قانون 2022 .
هاد الهاشتاغ جا كرد فعل على تسريب تم عبر صفحة فيسبوكية، لمقاطع من مسودة ديال قانون كيقنن الخدمة فشبكات التواصل الاجتماعي.
من بين الملاحظات اللي أثارت انتباه الأمة فهاد التسريب واحد الفقرات كتعاقب بالحبس اللي كيدعو لمقاطعة بضاعة أو منتوج أو علامة تجارية. بلغة مبسطة أكثر، يلا ماعجبوكش لي كوش ديال الوليد الصغير، ولا البنية الصغيرة وكانوا كيديرو البلل بزاف، وكيوقع فيهم التسريب ومشيتي للصفحة ديالك فالفيسبوك، وكتبتي « خوتي خواتاتي لي كوش الفلان فلانيين راه فيهم التسريبات ماتشريوهومش »،تمشي للحبس نتا والوليد مسيكين والبنية حتى هي اللي وقعات ليهم التسريبات بسباب دوك لي كوش
مثال آخر باش يتوضح المقال: يلا شريتي العدس من عند مول الهري اللي تحت داركم، ولقيتيه قديم وفيه الدود، وكتبتي فالفيسبوك ولا فتويتر ولا حتى فسناب شات أو إنستغرام « العدس ديال خونا فالله مدود، ماتبقاوش تشريو منو » يقرقبو عليك وتمشي بتهمة مانعرف شنو، ولكن تمشي...
القضية سوريالية وكتضحك فالظاهر، ولكنها فالعمق كتخلع، حيت باقي معانا بنادم كيفكر أنه يدير لينا اللجام، ويسكت صوت هاد الشعب الحر، وهادي مسألة مايمكن لك تفكر فيها إلا يلا كنتي ماشي مغربي. أما يلا كنتي من بلاد منبت الأحرار غادي تعرف أن المغاربة يجبدوك يجبدوك فهادي ومايمكنش، حتى ضحك، يقبلوا منك تفكر ليهم فبحال هاد البلانات الخاوية والمثقوبة.
تيبقا دابا السؤال: شكون عندو المصلحة يخرج حاجة قديمة ويعطيها لصفحة فالفيسبوك ويقول ليها « ديماري » ونوضيشويةديالالعججالافتراضيعلىهاداولاعلىهادي؟
فالحقيقة الجواب ماشي مهم. أهم منو نقولو أن هاد اللعب الصغير بين ناس صغار هو اللي يقدر يورطنا فأمور كبيرة. وهادي قلناها ديما فوقما شفنا شي يديدة أصغر بكثير من أنها تلعب بالبلاد كتجرب زهرها وصحتها مع الشعب ومع البلاد...
الخوت، الضحك مامعاهش الضحك، وهادشي ديال « ضع له قشرة موز في الطريق لكي نبتسم قليلا » ماشي خصايل المسؤولين الحقيقيين.
وبلا مانزيدو نبينو الهضرة، حيت اللبيب بالإشارة يفهم والله يطيحنا فاللي يفهمنا ومايعطيناش، ويهنينا من بحال هاد صداع الراس الخاوي اللي والله ماعندنا مانديرو بيه دابا.