صدمة فالجابون.. رئيس الوزاراء السابق شينزو آبي مات بعدما تيرا فيه شخص وسط تجمع انتخابي – فيديوهات

أكد مسؤول فالحزب الليبرالي الديموقراطي وفاة رئيس الوزراء الجابوني السابق شينزو آبي بعدما تيرا فيه شخص بالقرطاس وسط تجمع انتخابي اليوم الجمعة، وهادشي زاد أكدوه المسؤولين فالصبيطار اللي داو ليه شينزو.
وقالت هيئة الإذاعة والتلفزيون فالجابون (NHK): "رئيس الوزراء السابق آبي مات فالصبيطار ديال مدينة كاشيهارا فمنطقة نارا، فالوقت اللي كان كيتعالج بعد الهجوم عليه".
ودخلو البوليس على دار شخص شدوه من بعد هاد الهجوم المسلح ، حسب اللي ذكراتو ال"NHK".
وفلقطات دوزها التلفزيون الجابوني بانو عدد من عناصر البوليس وهوما كيدخلو لعمارة قالت وسائل إعلام أنها دار الراجل اللي تعتاقل بعد الهجوم بتهمة محاولة القتل.
ووصف رئيس الوزراء الياباني الحالي فوميو كيشيدا الهجوم بأنه " عمل همجي فأيامات الحملة الانتخابية اللي هي أساس الديموقراطية. هادشي مامقبولش فبلادنا وكندينوه بقوة".
وكان رئيس الوزراء السابق (67 عام)، كيخطب فتجمع انتخابي قبل انتخابات مجلس الشيوخ اللي غتدار نهار الأحد الجاي فالوقت اللي تسمع صوت التير بالقرطاس.
وقال مصدر من الحزب الديموقراطي الليبرالي الحاكم لوكالة "جيجي برس" بللي آبي طاح للأرض وكان كينزف من رقبتو، حسب وكالة "فرانس برس".
وكان آبي هو رئيس الوزراء اللي بقى فالسلطة لأطول مدة فتاريخ بلادو. دوز عام فالمنصب ف2006، ومن بعدها مابين 2012 إلى 2020 فاش اضطر للاستقالة لأسباب صحية.
وكتطبق اليابان واحدا من أكثر القوانين تشددا صرامة فمراقبة الأسلحة فالعالم. وعدد الضحايا فحوادث إطلاق نار فهاد البلاد الآسيوية اللي فيه 125 مليون نسمة، قليل بزاف، لذلك مزال كلشي مصدوم من هاد الفاجعة اللي وقعات.