لكلاشات خدامة. بنكيران للفتيت: ما غنسكتوش على تهديدك. كيفاش تظلمنا وما نتكلموش. ايلى رديتي علي واش يقدر المواطن يتكلم؟ علاش تاهمتينا فافساد الانتخابات. كنا نفسدو 2021 بعد داك الدگديگة كلها باش ما نقولش انك انت اللي دگدگتيهم

نايضة كلاشات بين عبد الاله بنكيران الامين العام لحزب العدالة والتنمية رئيس الحكومة الاسبق وبين عبد الوافي لفتيت وزير الداخلية. بعد اتهامات الاول لما حدث فانتخابات مكناس الجزئية نهار الاحد اللي فات ورد الداخلية فبيان البارح الاثنين. اليوم خرج بنكيران هاجم لفتيت.
الامين العام للعدالة والتنمية قال ففيديو للفتيت باللي البيان مصادرة للحق فالتعبير عن رأي "واش عندنا الحق نتكلمو ولا ما عندناش الحق نتكلمو؟" تساءل بنكيران. اللي زاد باللي حزبو تظلم فالانتخابات "تظلمنا وما نتكلموش" وخاطبو: تحيدو لينا حتى الحق فالكلام".
بنكيران اعتابر ان رد وزارة الداخلية مهين ليه. غير مناسب لقيمتو. نوع من انواع مصادرة الحق فالتعبير لحزب سياسي "ردك على زعيم سياسي كان فيوم من الايام رئيس الحكومة" وذكرو باللي ما تكلمش فالفيديو لا على رئيس الدولة ولا على وزارة الداخلية" بل غير على "بعض رجال السلطة".
وذكرو انو قال ليه شي نهار وحلف ليه ما يسمح بتزوير الانتخابات او المس بها.
بنكيران مشى بعيد فواحد المقطع باش قال للفتيت "واش بغيتي العلاقة ديالنا مع الدولة يطبعها الخوف" كيف كان فمرحلة اوفقير والبصري. ثم ذكر باللي "سيدنا قسم لي بالله ما عمر مرحلة البصري ترجع" واعتابر الرد عليه يدخل فهاد المرحلة الخوف "ايلى رديتي علي اتساءل واش باقي شي مغربي يتكلم معاك".
وعاد ليعاتب لفتيت ويقول ليه "رجعت خدمة للبلد وللوطن ثم الحزب". "علاقتي طيبة مع جلالة الملك اشكره لحد الان". "باش وقفات علينا بلادنا لگاتنا". و"ما متفقش معاك ما يليقش بيك ما يليقش بوزارة الداخلية" وزاد باللي مع حزبو عاش المغرب "10 سنوات من الاستقرار العظيم"
بخصوص عبارة المغرضة اللي جات فبيان الداخلية فوصف اتهاماتو لرجال السلطة فمكناس قال بنكيران " باش عرفتيها مغرضة. دخلتي معانا فالنية ديالي" وبخصوص افساد العملية الانتخابية رد عليه "علاش نفسدو الانتخابات. ما هو الداعي. نفسدو 2021. بعد داك الدگديگة كلها. باش ما نقولش انك انت اللي دگدگتيهم.
وقال ليه "علاش تهمنونا بالاغراض. تقدر تقول باللي غلطت وانا ماشي مغرض اسي عبد الوافي. انا صادق كنخدم فبلادي. حشومة عليك".
بنكيران مشى بوتيرة مرة مسخسن مرة مبرد. باش كيطلع الايقاع كيهاجم. قال للفتيت "ما تقدرش تكاموفلي الحقيقة. حزب البي جي دي ما محتاجش يعطي البرهان على حتى شي حاجة. وذكرو ب"الشرف والموضوعية والمسؤولية" بل خاطبو "ايلى بغيتي تحاكمي ادبيا انا موجود".
ووعد باش ما يسكتش علي التهديد "اايلي كان تهديد فيه غير سكتو ولا نوضو ليكم٬ راه دابا ما نسكتوش".
وذكر باللي جماعة الدخيسة فمكناس كانت نسبة التصويت 73 بالمائة وتحدى بنكيران لفتيت يشرح ليه. وقال ليه خرج الكاميرات والتصاور ديال هاد الشي.
فاللخر قال باللي حزبو غادي يمشي للمحكمة الدستورية للطعن فانتخابات مكناس الجزئية.