ها علاش خاص بنعرفة يمشي فحالو حقاش عايش فعالم اخر. كاليك ما كاينش مشكلة فالاغلبية وباللي حتى حد ما اتصل بيه" واش انت اللي خاصك تتصل ولا هما وواش ما كتقراش ما كتسمعش

بنعرفة البي جي دي سعد الدين العثماني اللي كيرأس الحكومة كيضحك علينا وعلى حلفاؤو ولا جاي من شي كوكب بعيد. نايضة قربالة فالاغلبية ومهددة بالتشتت وهو خرج فتصريح باش ما نسبوهش نقولو غبي. رئيس الحكومة قال ل"ايلاف" انه ما كاينش شي خلاف فالاغلبية.
طبعا كيهدر على تبعات خطاب عبد الاله بنكيران الامين العام السابق للحزب فمؤتمر الشبيبة بالرباط نهاية الاسبوع واللي تيرا فاخنوش وفلشكر حلفاؤو فالحكومة.
اكثر من ذلك قال هاد اللي رئيس حكومة باللي حتى حد من زعماء الاغلبية ما اتصل بيه. يا حليلك بغيتيهم هما يتاصلو بيك. راه العبث. واش هما تعرضو للهجوم وبغيتيهم يتاصلو بيك يتشكاو ولا انت اللي خاصك تتصل مباشرة بعد الكلمة وتشرح وتفسر وتوضح. مصدر ل"كود" قال باللي ما بقاش لوجه عند صحاب البي جي دي باش يقابلو وزراء الاغلبية بعد كلمة بنكيران وابن عرفة كيقول ما اتصل بي حد.
علاش بغيتيهم يتاصلو بيك علي اجتماع الاغلبية ولا يسولوك علاش كنتي كتضحك باش بنكيران كان كيقصف.
كاينة ازمة وغايين للحايط وهو زايد كيشعل العافية بتصريحاتو هادي