خاليلوزيش ماتسرطاتش ليه الإقالة قبل المونديال

مازال المدرب البوسني وحيد خاليلوزيش ماتسرطاتش له الإقالة ديالو من المنتخب الوطني المغربي لكرة القدم، وكيشعر بالحزن والغضب الكبير بسبب الانفصال على الأسود قبل أسابيع، فقط من الانطلاقة ديال كأس العالم.
وعبر وحيد خاليلوزيش تصريح إعلامي له على الغضب ديالو والألم لي كيشعر بهم بسبب الانفصال عليه من طرف الجامعة الملكية المغربية لكرة القدم، من بعدما رفض توجيه الدعوة لمجموعة اللاعبين لي بعدهم من ليكيب ناسيونال.
وقال الناخب الوطني فتصريح لموقع "Reprezentacija.ba"، أن الإقالة ديالو من المنتخب المغربي ألماتو وضراتو بزاف واستغرب من النعت ديالو بالملعون أو المنحوس، وجاوب وقال: "أنا راه هو أنجح مدرب فتاريخ المنتخب المغربي وبالاحصائيات، المهم هاذشي ما بقاش كيهم دابا، مع الأسف هاذي هي المرة الثالثة لي كيوقع ليا هذا الأمر فالمسيرة ديالي، وبقى فيا الحال نظرا الاجتهاد لكبير ديالي فالعمل لي كندير".
وكشف وحيد خاليلوزيش حسب نفس المصدر، أنه كان بالإمكان ديالو يوافق على عودة اللاعبين المستبعدين من المنتخب المغربي وينادي على العناصر لي ماكيناديش عليها، ويسمح لأشخاص آخرين يحددو شكون يمشي لكأس العالم، مقابل البقاء فالعمل ديالو كمدرب ديال ليكيب ناسيونال، ولكن هاذشي غيقلل من القيمة ديالو، وغينقص من احترام اللاعبين له وماغيبقاش مدرب.
وحيد خاليلوزيش لي عندو 70 سنة، أكد على أنه توصل بعروض من منتخبات وطنية وأندية، كتطلب الخدمات ديالو، ولكن هو كيفضل يدوز الوقت الحالي مع العائلة ديالو، وشدد على أن تدريب المنتخب المغربي غالبا غيكون آخر محطة وتجربة فالمسار ديالو التديربي.
وكانت الجامعة الملكية المغربية لكرة القدم علنت قبل أسبوع، على الانفصال عن الناخب الوطني وحيد خاليلوزيش بالتراضي، دون تحديد الخلف ديالو ولو أن جل المؤشرات كتقول على أن وليد الركراكي المدرب السابق ديال الوداد هو الناخب الوطني المقبل، مع العلم أن هاذي هي المرة الثالثة لي كتم فيها إقالة وحيد خاليلوزيش من منتخب تأهل معه المونديال، بحيث وقعات له مع المغرب وقبل منها مع الكوت ديفوار سنة 2010، واليابان سنة 2018، وشاكر مرة واحدة فكأس العالم مع الجزائر سنة 2014.