واش المغرب عطى "باس كونسولير" للامام المتطرف إيكويوسن ومن بعد سحبو؟. مصدر ل"كود": هادا نقاش خاوي. المغرب واضح وكاع مواطنيه كيفما كان توجههم من حقهم يرجعو لبلادهم شرط نتأكدو انهم مغاربة وفقضية الامام يشدوه بعدا وديك الساعة نشوفو

نايضة ففرانسا علي الامام المتطرف اللي كيسب ليهود وكيكره لعيالات حسن إيكويوسن. بعدداع قرار مجلس الدولة تأييد قرار الحكومة الفرنسية طرد هاد الامام وارسالو للمغرب واخا تزاد تماك لانو مازال مغربي وما تعطاتوش الجنسية الفرنسية.
دابا فرانسا كتقول راها كتقلب عليه وباش تشدو ترسلو للمغرب. صحف فرانسا كتهدر على ان هاد الامام مشى لبلجيكا. هاد الدولة كتقول باللي ما عندها حتى شي مراسلة من فرانسا باش توقفو.
لكن النقاش بزاف على واش المغرب عطى "باس كونسولير" لهاد الامام ولا اللا؟ كاينة رواية كتقول باللي تعطاه هاداك الباس اللي كيتعطى مرة وحدة باش يدخل للبلاد عوض الباسبور ومن بعد المغرب الغاه. هادي رواية ما شاداش.
مصدر ل"كود" قال باللي هادا نقاش مغلوط وما كيهمش المغرب حتى فحاجة. مصدر "كود" قال باللي اللي كاين هو ان بلادنا كتقبل كل مغربي مغربي يرجع لبلادو شرط تتحقق منو السلطات ديالنا واش بصاح مغربي بعدا.
يعني انو يكون ارهابي داعشي فسوريا او متطرف فاوربا او حراگ فايطاليا او فرانسا او اسبانيا باش كتحقق منو السلطات المتخصة باللي مغربي كياخد ديك الورقة للي كتسمى الباس كوسولير وللي كتعطيه القنصليات ديال المغرب.
فحالة هاد الامام كتنطابق على كاع لمغاربة٬ غير هو يشرح مصدر "كود"٬ قبل ما ياخد هاد الباس كوسولير خاص السلطات الفرنسية توقفو ومن بعد تقدمو للقنصلية المغربية وباش تتأكد هاد القنصلية باللي مغربي راه ياخد ورقة يمكن بيها يدخل لبلادو. اما الهدرة علي هاد الوثيقة بلا حتى ما يعرفو فين كاين دابا هاد الامام راه غير مزايدة وصافي" يضيف مصدر "كود".
يعني ان المغرب فاللول وافق موافقة مبدئية على باش يعطيه "باس كونسولير" حقاش يستحيل يعطي ورقة لفرنسا وهي خاصها تعطي للمعني بالامر باش يكون حاضر يؤكد مصدر "كود"