التي جي في مراكش اكادير ها علاش خاص فرانسا تاخدو ماشي الصين. الدولة الوحيدة اللي قادرة تخدم الفيطو ايلى تمست مصالح المغرب وفيها مليون مغربي عايشين ومعيشين الاف الاسر بلا ما نهدرو علي التاريخ والاستثمار

باش الملك محمد السادس اعلن فخطابو الاخير على ان التي جي في خاصو يوصل مراكش باكادير ناضت اصوات كتقول هاد المشروع خاصو ياخدوه الشينوا. خلال اللجنة العليا المغربية الفرنسية الاخيرة هدر ايدوار فيليب الوزير الاول الفرنسي على ان العثماني خبرو باللي الرباط فرحانة بنتائج حققها التي جي في طنجة الدار البيضاء. اشارة واضحة ان الموضوع تجبد وان باريس عندها اسبقية باش تاخد مشروع خط مراكش اكادير. ايدوار فيليب قال مادام هاداك الشي عجب المغرب ما كايناش يوقع تغيير. بلا ما كيقولها كيهدر على المشروع المقبل.
قبل هاد الزيارة كان وزير الاقتصاد الفرنسي برونو لومير انتقد تهجير شركات فرنسية الى دول منها المغرب. البعض اعتبرها محاولة ضغط فرنسية علي المغرب باش يعطيه التيجيفي. هاد الشي مقبول فالسياسة. سواء كان كيضغط او كان كيخفف ضغط داخلي ففرانسا عاشت وكتعيش ازمة كبيرة مع احتجاجات “الجيليات الصوفر”٬ فهاد الشي ماشي خايب.
فرانسا هي اللي خاصها تاخد هاد المشروع. ماشي بدافع اللوبي الفرنكفوني المتحكم فالاقتصاد وديك الهدرة الاخرى. بل بدافع مصالح عليا للمغرب. دابا ايلى قارنا فرانسا بالصين راه لا تجوز اصلا المقارنة.
فرانسا عندنا معاها تاريخ. كان خايب او زوين راه شركنا معاهم الطعام وعندنا تاريخ مشترك معاه. عندنا معاهم الجغرافيا. قراب لينا. شي رحلات كدار فاقل من جوج سوايع من كازا لشي مدن فرنسية او 3 سوايع بين باريس وكازا. رحلات بحرية كدار فوقت قصير. مع فرنسا عندنا معاهم مغاربة كثار. قرابة مليون مغربي عايش من اصل 5 مليون مسلم وغيرو فهاد الدولة. يعني ولات حياة اجتماعية عندها اثر اقتصادي وثقافي. هادو كيعاونو عائلاتهم. كيدخلو للمغرب العملة الصعبة واخا نقصات مع الازمة الاقتصادية اللي عرفاتها فرنسا اخيرا واثرات على الفئات الهشة اللي منهم مهاجرين.
فرنسا داعمة المغرب فكاع القضايا والمجالات. طبعا باش تربح وحنا نربحو. وهادا هو التعاون الحقيقي. بلا فرانسا ما كانش يكون عندنا صناعة السيارات ولا نحلمو بيها. بدات بنيسان رونو ودازت لبوجو. خلاو دول بجال الجزائر وجاو للمغرب. ولينا كنصدرو كاع السيارات.
كاين التعاون الاقتصادي الكبير. واحد الوقت من اصل 40 شركة فرنسية كبيرة فبورصة باريس اسمها “كاك 40” كانت 39 شركة. يعني التعاون كبير. فالبحث العلمي بين الجامعات فالفنون شوفو غير المعارض لكبيرة اللي دارت فمتحف محمد السادس فالرباط وشكون جاب لينا هادوك المعارض لكبيرة. فالفلاحة فالصناعة فالتكنلوجيات الحديثة.
واش الصين اللي بعيدة علينا بزاف وعضو دائم فمجلس الامن الدولي عمرها خدات حتى موقف من قضية الصحرا. ديما شادة لعصا من الوسط. ما باغياش تقلق الجزائر اللي كيدير معاها البيزنس والمغرب اللي كتمنى تاخد منها المارشيات. لنفرض ان الصين خدات صفقة التيجيفي مراكش اكادير واش غادية دير كيف صفقة مقطع لوطوروت كازا بني ملال وجابت ليه حتى شي عمال من الصين. واش ايلى خدات الصفقة غادية تجيب شينوا كيف اشترطات باش تاخد ميناء الناظور هادي سنوات ورفض المغرب؟ ثم واش الصين غادية تخدم شي نهار الفيطو فمجلس الامن دفاعا عن مغربية الصحراء.
ما كاينة حتى دولة من الدول 5 الدائمة العضوية فمجلس الامن الدولي اللي قادرة تتقاتل علي المغرب ودافع عليه. كتهدد حتى بالفيطو ايلى تمسات مصالح هاد لبلاد.
راه المصالح متداخلة مع فرانسا. اكيد ايلى خدات المارشي غاديين يخدمو مغاربة او فرنسيين من اصل مغربي فهاد المشروع. غاديين يتخلصو بالاورو وغاديين يرسلو منو لعائلاتهم عندنا يعني كلشي غادي يستافد والناعورة غادية دور.
اش لاحنا للصين. دولة قمعية كتقتل فشعبها المسلم وهادي حقيقة كتقولها منظمات دولية ببرودة. ما كيجمعنا معاها والو. تعطينا التيساع راها ما عندها باش تنفعنا. فرانسا اللي غادية تبقى لينا. فرانسا واسبانيا. الجيران رغم كل المشاكل هما للي يقدرو يوقفو معانا فالشدة. هاد الشي علاش ديما خاصنا نبقاو مع فرانسا