اش هاد لحماق والتهور وصلاتو الخارجية زمن بوريطة. كيفاش شي قناصلة كيجمعو لفلوس فاوربا كيف دارت وحدة ففرانسا اللي خدات من جمعية اسلامية 10 الاف اورو باش تفرقهم على لمغاربة اللي حصلو تماك =فيديو

واحد لخبار وصل ل"كود" من مصادر في الجالية المغربية المقيمة بأوروبا يقول بأن عدد من القناصلة، بسبب ضعف الموارد المالية لتغطية مصاريف إيواء المغاربة العالقين بالخارج، اتصلوا بعدد من رجال الأعمال المغاربة والتجار باش يعطوهم مساعدات مالية لهذا الغرض، إي الإنفاق على العالقين.
هاد الشي كيأكدو فيديو واضح باين لسعاد الزايري قنصلة المغرب فكولومب ضاحية باريس ففرنسا. فيه كتشكر اللي دعمو لمغاربة اللي حصلو فالدائرة 92 وقالت باللي ساعداتها جمعية التضامن الاسلامي اللي مكلفة بالجامع ب"شي بركة" غادية تكون على شكل "قفة" وغادية تكون فلوس تفرق كل جمعة. وهدرات على جمعيات اخرى.
وفق مصادر "كود" فان هاد الجمعية اللي مكلفة بتدبير جامع تماك عطات 10 الاف اورو. كيفاش قنصلة تاخد لفلوس بهاد الطريقة وتتصور. اش وقع لهاد القناصلة. واش من حقها تشد لفلوس وتفرقهم هي واش من حقها تجمع تبرعات واخا لمغاربة حاصلين تماك. علاش ما تكونش جمعيات دير هاد الشي مباشرة بلا ما توصل لهاد المستوى. هاد الشي راه كاش. غادي يدير مشكلة مع فرانسا ومشكلة مع اوربا ومشكلة مع دول اخرى عندهم حتى هما ناسهم حاصلين مع هاد الجايحة. وزايداها القنصلة بدعاء لمول لبلاد. علاش. ايلى غدا هاد الجمعية كان عند شي حد فيها علاقة بالارهاب او بتمويلو فين نويلو.
مصادر "كود" كتقول بأن شي عملية النفقات من شي قنصليات غامضة وغير خاضعة لرقابة الدولة حيث ما فيهاش شفافية. واش غادية تكون الشفافية مع ليسبيس.
أكثر من ذلك أن الناس ديال الجالية استغربوا لهاد التناقض بين ما صرحت به الخارجية ناصر بوريطة أنها تكلفت بجميع نفقات هاد المغاربة اللي حاصلين على برا، وبين تصرف بعض القناصلة في دول اوروبية اللي عيطوا على مغاربة لاباس عليهم باش يعطوهم لفلوس حيث ما قادتهمش ميزانية الخارجية.
نفس القنصلة سعاد الزايري كتعتارف بلسانها باللي شي وحدين كيبانو فطونوبيلاتهم. فين داك الشي اللي كيقولو على لوطيلات ووو
مصدر ديبلوماسي ما بغاش يكشف هويته لأنه غير مأذون باش يتكلم ف هاد الموضوع، لم ينف ل"كود" أو يؤكد صحة الخبر، علق على هاد الشي قائلا " هاد القصة غامضة وغريبة وخاص الخارجية تتحرك وتراقب عدد العالقين وشحال كيصرفو عليهم ومنين كيجيبو لفلوس". وزاد قال في تصريحه " أن هاد المسألة تقضي على صورة المغرب في الخارج وتفتح الباب أمام بعض افراد الجالية وخصوصا المهربين باش يبقاو يحكمو ف القنصليات، وأكثر من ذلك هذه عملية جمع أموال واخا مساعدات انسانية مرفوضة تشرف عليها القنصليات حيث هي خارج القانون وما عرفناش مصدر هذه الأموال ومدى شرعيتها" حسب تصريحه.
اوا دابا السي بوريطة واش قاد بوزارتك ولا ما قادش، راه الأمور كبرت عليك بزاف وقصة نفقات المغاربة العالقين فيها شبهات مالية وخاصكم توضحو للرأي العام حقيقة هذه الأخبار خصوصا انكم مرتابكين في تدبير هاد القضية من راسها حتى لساسها.
قضية وصلات لداك الشي اللي وقع لقنصل المغرب فوهران لقناصلة خراين ومعاهم سفرا تشوهو بانو كيفرقو لفلوس بحال اللي وقع فاول ايام كورونا فاسبانيا على مغاربة باش يرجعو لايطاليا. قنصل المغرب فالخزيرات باسبانيا كيعطي كل واحد خمسين اورو. هادي صور كتسيء للمغرب. هادا هو زمن بوريطة فالخارجية