بورتري. الملكة اليزابيث الثانية بقات 70 عام فالحكم: شكون هي؟ شنو حققات؟ وكيفاش حافظات على الملكية هاد السينين كولها؟

الملكة إليزابيث الثانية تعرفات بجديتها وانضباطها و بإحساسها بالمسؤولية وتصميمها على تكريس حياتها لعرشها وشعبها.
ثارت الانتباه بزاف بالحفاظ ديالها على النظام الملكي و الاستقرار ديال البلاد خصوصا انه مكانش من المتوقع انها هي اللي غتتولى العرش.
تولدات إليزابيث ألكسندرا ماري وندسور في 21 أبريل 1926 ، فدار قريبة من ساحة بيركلي في لندن ، وهي البنت الكبيرة ديال ألبرت، الولد الثاني لجورج الخامس ، ودوقته ، السيدة السابقة إليزابيث باوز ليون.
تلقات إليزابيث وختها الوحيدة مارغريت روز، اللي تزادت عام 1930 ، تعليمهم في المنزل وكبرو فاجو عائلي فيه الحب،وكانت إليزابيث قريبة بزاف من باباها وجدها ، جورج الخامس.
تعليم الملكة كان كيتركز على التاريخ واللغة والادب، ووخا مالتحقاتش بالمدرسة كانت بارعة فاللغات ودارت دراسة مفصلة للتاريخ الدستوري و بينات على حس المسؤولية فاسن صغير.
فاش مات الملك جورج الخامس عام 1936، ولا ولدو ، ديفيد، الملك إدوارد الثامن. ولكن فاش تزوج الأمريكية واليس سيمبسون، اللي مطلقة جوج مرات، مكانش مقبول لاعتبارات سياسية ودينية، الشئ اللي خلاه يتنازل على العرش فنهاية نفس السنة.
من بعد تولى جورج السادس الحكم ،ولد جورج الخامس، وبحكم قرب اليزابيث الثانية لباها كانت عندها فكرة على السياسة وخصوصا فاش تدهورات الحالة الصحية دالملك وولات كتبان الملكة اليزابيث بزاف حتى جا الخبر ديال الوفاة ديالو.
الملكة تزوجات عن حب حيث كانت كتعرف راجلها فيليب قبل من زواجهم وكان كيراسلها. فيليب انضم لسلاح البحرية الملكية البريطانية في عام 1939 وهو فعمرو 20 عام . ومن بعد الحرب العالمية الثانية ، وافق الملك جورج السادس لفيليب بالزواج من إليزابيث من بعد رفض وتردد. وقبل من الإعلان الرسمي ديال خطوبتهم في يوليو عام 1947، تخلى على كاع ألقابو اليونانية والدانماركية باش يكون مواطن بريطاني مُجنسً، وخدا اسم عائلة أجداده لأمه وهو ماونتباتن.و تزوج من إليزابيث في 20 نوفمبر 1947 .
الملكة ولدات سنة 1948 ولدها الكبير تشارلز، ومن بعد ولدات بنت،آن، سنة 1950.
في يناير 1952 ، مشات إليزابيث، وهي فعمرها 25 عام، مع راجلها فيليب في جولة خارجية ومشا الملك للمطار باش يودعها مخالفا لإرشادات الطبية ،وكانت هادي اخر مرة غتشوف الاب ديالها حيث مات وهي فكينيا.
الملكة إليزابيث سمعات بوفاة الملك ورجعات بالزربة للندن متفاجأة حيث باقية فاسن صغير وعندها بزاف دالمهام كيتسناوها.
الملكة اليزابيث واجهات معارضات فاش تم التتويج ديالها كملكة سنة 1953خصوصا من رئيس الوزراء ونستون تشرشل،الناس تجمعات حدا تلفازة باش يشوفو التتويج والملكة وهي كتأدي القسم ديالها.
الحرب العالمية الثانية سرعات نهاية الإمبراطورية البريطانية، وتزامنا مع الوقت اللي بدات فيه الملكة الجديدة جولة طويلة فالكومنولث في نوفمبر 1953، خدات بزاف ديال الممتلكات البريطانية السابقة الاستقلال ديالها، فحال الهند.
الملكة كانت محبوبة وعزيزة على كلشي ماشي غير الشعب البريطاني وسافرات لبزاف الدول وكانت حشود من الناس كتتلقا ليها، وكتعتبر اكبر حاكمة سافرات بزاف في التاريخ.
وبغض النظر على ان النظام الملكي ففترة لملكة مكانش قوي، كانت كدير كل ما فجهدها باش تحافظ على مكانة واحترام النظام الملكي فقلوب الشعب البريطاني.
توفات محبوبة القلوب، الملكة الاستثنائية، اللي كانت رمز للحكمة والتسامح والتقدير اليوم 8 شتنبر 2022، من بعد معاناة مع المرض.