لعاب مهم فالرجاء رجع للخضرا

استرجع الرجاء الرياضي اللعاب ديالو محمد زريدة اللي غاب على الخضرا لتقريبا شهر، بسبب الإصابة اللي تعرض فماتش الخضرا والمغرب التطواني فالجولة 3 من منافسات البطولة الإحترافية لكرة القدم.
وكشف مصدر مطلع أن منذر الكبير مدرب الرجاء الرياضي غادي يكون بالامكان ديالو الاعتماد على محمد زريدة اللي كيتعتبر عنصر أساسي ومهم فتشكيلة الخضرا، وذلك إبتداء من هاذ الويكاند فالماتش ضد نيجليك الفريق ديال النيجر ضمن منافسات دوري أبطال إفريقيا.
المصدر نفوس أكد أن محمد زريدة تعالج من الإصابة اللي كانت عندو فالكتف ديالو وسمح له الطاقم الطبي باش يدرب مع الكروب، مع العلم أنه إلى لعب الماتش الجاي فغادي يكون أول ماتش له مع المدرب منذر الكبير، حيث ملي توعت كانت فهذاك الوقت فوزي البنزرتي المدرب السابق هو اللي كيشرف على تدريب الخضرا.
وكان محمد زريدة خرج مصاب فماتش الرجاء الرياضي والمغرب التطواني نهار 18 شتنبر اللي فات من بعد مرور دقائق فقط على إنطلاق المواجهة من بعدما تصاطح مع صاحبو فالفرقة عبد الإله مدكور، وما قدرش يكمل الماتش ومن بعد نهاية المواجهة خضع للفحص الطبي اللي كشف أنه تفك له لكتف.