ضحى المدني: فخورة حيث ماركيت أول بيت للمغرب فالمونديال وكنهدي الرباح للمغاربة – فيديو

عبرت ضحى المداني نجمة المنتخب الوطني المغربي لأقل من 17 سنة على الفرحة ديالها من بعدما سجلت أول بيت فتاريخ كرة القدم المغربية فكأس العالم للناشئين، وكان هاد شي اليوم ملي ضربت الهدف الأول للمغرب على المنتخب الهندي فالجولة الثانية من دور المجموعات فالمونديال المقام فالهند، وساهمت فالرياح ديال ليكيب ناسيونال الأول فكأس العالم.
وبخصوص الأجواء اللي كانت فالماتش، وضحت ضحى المداني: "فالشوط الأول خرجنا بالتعادل، وفالجولة الثانية دخلنا وحنا عازمين على تحقيق الرباح وحاولنا نطبقو تعليمات الكوتش وحققنا الفوز وخذينا 3 بوان ".
ضحى المداني سعيدة بزاف حيث ماركات أول هدف للمغرب فالمونديال وفخور بهاذ الإنجاز التاريخي واكدت أيضا: "راني فرحانة بزاف بهاذ الرباح وحيث أنا هي أول مغربية ماركات فكأس العالم للناشئين، وهاذ البيت كنهديه للجمهور اللي ساندنا وخا خسرنا فالماتش الأول وديما مغرب".
ونجح المنتخب المغربي النسوي لأقل من 17 عام، فتحقيق أول انتصار فمونديال الناشئات من بعدما ربح الهند بنتيجة 3 لزيرو، فالجولة الثانية من دور ليكروب، وكيتسناه ماتش ثالث مع الميريكان، حيث خسر الجولة الأولى مع البرازيل بصعوبة بهدف واحد لصفر.