شوهة جديدة ولايف فالبطولة.. تيران البشير طفا فيه الضو فماتش المحمدية وليفار

كتواصل الغرائب والعجائب فزمن البطولة الاحترافية والحادث الجديد هو الضو اللي طفا فتيران البشير فمدينة المحمدية مساء اليوم الجمعة، فماتش شباب المحمدية والجيش الملكي، ضمن مؤجل الجولة 6 من البطولة الاحترافية لكرة القدم.
تيران البشير كان ناوي يسالي الماتش قبل الحكم نبيل بنرقية، حيث فالدقيقة 94 من عمر المواجهة اللي كانت عرفات تعادل بهدف لكل فرقة، غادي يطفا الضو فالتيران وبقات غير الظلمة، الأمر اللي تسبب فتوقف الماتش اللي كان منقول مباشرة على قناة الرياضية، فشوهة جديدة للبطولة فزمن الاحتراف.
الماتش ظل متوقف ما بين الفريقين وسط الظلمة والارتباك ديال كاع اللي كانو فالتيران، وحتى المعلق ضربها بسكتة، حيث حتى واحد ما كان عارف واش الضو مقطوع غير فالتيران ولا فمدينة المحمدية كلها ولا شنو واقع فالأصل، فالوقت اللي واحد لاكليك من الجمهور شعلات الشهب الاصطناعية باش الضوي على رأسها أما البقية فكل واحد جبد تيليفونو باش يضوي على راسو.
وبعدما دازت شي دقايق رجع الضو لتيران البشير، وعلن الحكم نبيل بنرقية على استئناف الماتش ما بين شباب المحمدية والجيش الملكي، لكن بسرعة علن على نهاية المواجهة اللي سلات بالتعادل قبل ما يرجع الضو يطفا عوتاني وتولي الشوهة كبيرة.