وا لاباس كاين عقلاء فالداخلية. عامل المحمدية خدا قرار فصالح الرجا وضد الوداد الجمعة وتراجع عليه السبت

هشام لمدغري العلوي عامل مدينة المحمدية قرر الجمعة 17 يونيو 2022 يتلعب ماتش شباب المحمدية ضد الرجاء البيضاوي مع التسعود فملعب البشير بلا جمهور. كان قرار غريب فهاد التوقيت. ولكن تراجع عليه البارح السبت بقرار عاملي كيسمح للجمهور يرجع.
على سلامتنا كاينين حكما فوزارة الداخلية باينة جبدو ليه ودنيه. عرفو قرار بحال هادا عندو تبعات خايبة.
مبررو فمنع الجمهور فقرار الجمعة كان مبني على احتمال. دابا لجنة التأديب والروح الرياضية التابعة للجامعة الملكية المغربية كانت عاقبات نادي الرجاء البيضاوي على خلفية احداث وقعات فواد زم عن الدورة 24 باش تلعب جوج ماتشات بلا جمهور ومنعات تنقل جمهور الخضرا.
يعني اليوم ما مسموحش لجمهور الرجا يتنقل للمحمدية باش يدخل للتيران. ولد الراحل عبد لكبير لمدغري العلوي وزير الاوقاف والشؤون الاسلامية سابقا دار اجتهاد. توقع ان الجمهور يجي للماتش وتوقع ان هاد الجمهور يدخل لتيران المحمدية ويقدر يتخفى حتى بتونيات الشباب.
دابا صحح هاد الوضع ويمكن اليوم لجمهور الشباب يتفرج ففرقتو. الجانب الامني راه كاينة اجهزة قادة بيه. راه اي رجاوي دخل للتيران يخرج واخا يكون متخفي
كان ممكن للنادي يمشي للمحكمة الادارية ويطعن فيه. لكن العامل سهل عليهم القضية وتراجع. كون بقى القرار كان غادي يتحسب هاد العامل على الراجا وكان غادي يورط الداخلية فموشطبة ما تقدرش تخرج منو وديك عبارة "جهات عليا" اللي هدر عليها "الوينرز" غادي يولي عندها سمية.