علاش السواعدة شجعو بزاف الاسود فمونديال قطر. "كود" سولاتهم. بلى ما يمشي بالكم بعيد. غاديين تفاجئو باجوبتهم =فيديو

فملعب البيت بالدوحة لثلاث اللي فات =23 نونبر 2022= فماتش المغرب ضد كرواتيا فالمونديال القطري كان حضور كبير للجمهور السعودي. السواعدة جاو يشجعو الاسود. العدد ماشي الف او الفين او 3 الاف. العدد كان كثر "فالتيران كانو حدايا جوج سواعدة على ليمن وثلاثة على الشمال. كانو بزاف" تحكي مشجعة مغربية ل"كود".
شي سواعدة كيقولو باللي من اصل 59 الف شخص حضرو لماتش المغرب كان شي 30 بالمائة سواعدة. ما كايناش احصائيات دقيقة ولكن العدد كان كبير. التشجيع ما كانش غير فالتيران. كان ف"فان زون" فالبلايص اللي كدير الماتشات بشاشات عملاقة فبلايص فالدوحة.
"كود" خرجات فالشارع للدوحة وتلاقات عدد من هادوك اللي حضرو فحي مشيرب القريب من سوق واقف وكانت اجاباتهم غير متوقعة. بزاف كيشجعو المغرب بسباب حمد الله لاعب المنتخب المغربي اللي كان كيلعب فالنصر ودابا ف"الاتحاد" بالدوري السعودي. شي مشجعين كانو لابسين التوني ديالنا وشي كان داير الراية على كتفو
طبعا كاين شي سواعدة كيهدرو بديك الهدرة الانشائية ديال "الاخوة العرب" ووو" ولكن هاد الشي ما واكلش. حقاش ما شجعوش لا قطر فالماتش ديالها ولا تونس فاول ماتش ديالها٬ بالطريقة اللي شجعو بيها المنتخب المغربي. صحيح ان العلاقات المغربية السعودية فالتاريخ المعاصر ديما "اخوية" بلغة البلاغات الديبلوماسية٬ ولكن هاد التشجيع عندو علاقة بوجود نجم كيعتابروه كبير وكلشي كيسول وقتاش يدخل رسميا مع الاسود.