بودريقة الرئيس السابق للخضرا ل"كود": ما عمر الجماهير الرجاوية تكون ضد الوطن وكلنا مع جميع مشجعي لفراقي كنشجعو ورا الاسود وغاديين ندعموه فماتش الباراج ضد الكونگو

محمد بودريقة رجاوي مجنون على الخضرا قبل يولي رئيسها لسنوات. كيعرف مزيان جمهور الخضرا وكاع مكوناتو. الرئيس السابق للخضرا قال فتصريح ل"كود" باللي "تشجيع المنتخب المغربي مسألة محسومة عند كل رجاوي غيور".
بورديقة اكد ل"كود" باللي "ما عمر الرجاويين من نهار تأسيس النادي كانو خونة ضد الوطن. وباللي تاريخنا تاريخ النضال من اجل هاد لبلاد ومن اجل رموزها بحال المنتخب المغربي لكرة القدم".
واضاف فتصريح ل"كود" باللي "الرجاويين باش كيلعب المنتخب كيكونو راجل واحد مع كاع لمغاربة وجمهور كاع الفراقي ورا الاسود" مؤكدا فتصريحو ل"كود" باللي فماتش الاياب فباراج التأهيل لمونديال قطر مع الكونگو "غادي يكونو الرجاويين وبكثرة فالتيران بالراية المغربية".
رئيس الرجاء السابق قال ل"كود" باللي خاص التمييز بين ماتشات البطولة وبين ماتشات المنتخب. باش كتلعب البطولة ممكن تتعصب للفرقة ودافع على مصالحها ولكن مع المنتخب حاجة اخرى غاديين نشجعو بلادنا"
وكانو شي رجاويين٬ قلال ماشي بزاف٬ وبعد ما خرجات العقوبات ضد لاعبي الرجاء فماتش الفرقة ضد بركان٬ قالو باللي باغيين يشجعو الكونگو. اصوات قليلة ولكن نشاز