أديداس دخلت فقضية الفيفا وكرستيانو

أكدت شركة أديداس مولات بالون كأس العالم قطر 2022، بلي قرار الإتحاد صحيح بعدم احتساب هدف البرتغال الأول فمرمى الأوروكواي باسم الكابيتان البرتغالي كريستيانو رونالدو، وأن البيت ماركاه برونو فيرنانديز.
أديداس اللي كتصاوب كرة كأس العالم منذ سنوات، خرجت وضحت بلي عندها مستشعرات فالكرات اللي كيلعبوبهم اللعابا فالماتشات، وكشفت بلي آخر واحد لمس الكرة حسب المستشعر اللي كاين فالكرة اللي تماركات على الاوروكواي هو برونو فيرنانديز، ماش رونالدو واخا هو تبع الكرة براسو ولكن ما لمسهاش.
وخلق الهدف الأول ديال البرتغال فمرمى الاوروكواي جدل كبير، ماشي حيث الحكم حسبو ولا محسبوش، ولكن حيث الإتحاد الدولي لكرة القدم "الفيفا" حسب البيت فإسم برونو فيرنانديز اللي سونطرا الكرة لكريستيانو رونالدو اللي تهز لها براسو قبل ما ما تدخل للشبكة، ورونالدو كيقول بلي هو لمسها والأكثر من هادشي الإتحاد البرتغالي ناوي يراسل "الفيفا" باش يحيد الهدف لبرونو فيرنانديز ويعيطه لرونالدو واخا هما بجوجهم لعابا فمنتخب البرتغال.
ودابا ملي دخلت شركة أديداس فخط أزمة كريستيانو رونالدو، من المنتظر تزيد تكبر حيث الشركة المذكورة هي المنافس ديال شركة نايكي الراعي الرسمي ديال كرستيانو رونالدو سنوات هادي، أمام أديداس فهي راعي رسمي للغريم ديال رونالدو الأرجنتيني ليونيل ميسي.