واش بصح المشاغبين اللي دارو الفوضى فتطوان وداديين؟ .. أنصار الوداد كيستنكرو: ما عندهم علاقة بالفريق وبجمهورو

انتشرت، صباح اليوم الأحد، عدد من صور وفيديوهات كتهم أنصار الوداد الرياضي بإحداث أعمال شغب والاعتداء على مواطنين وممتلكاتهم بمدينة تطوان قبل من ماتش الفريق مع المغرب التطواني ضمن الجولة 11 من منافسات البطولة الاحترافية لكرة القدم، شي اللي خلق جدل كبير على حقيقة تاويداديت ديالهم وغرضهم فتشجيع الواك، خصوصا وأن "إلترا وينرز" الودادية نبهت الجماهير الحمرا ودعتها للتحلي بالروح الرياضية فسفرها لمدينة تطوان.
وتشكاو بزاف ديال المواطنين بمدينة تطوان من تعرضهم للسرقة والاعتداء على بعضهم من طرف شي وحدين محسوبين على جمهور الوداد الرياضي، ومن خلال صور وفيديوهات تنشرت على مواقع التواصل الاجتماعي على نطاق واسع، كيبانو عدد من الأشخاص وهم لابسين ليبرودوي كيشبهو للي كيلبسو الوداديين، وهم كيعتارضو طريق المواطنين وكيسرقوهم وكيدخلو للمحلات التجارية وكيسرقو المنتجات الغذائية الشي اللي جعل التطوانيين تشكاو من هادشي، خصوصا وأن المدينة معروفة بالهدوء ديالها وقليل فين كتعرف وقوع أحداث شغب وأو سرقة.
جماهير الوداد الرياضي حتى هي تفاعلت مع هاد أحداث الشغب وعبرت على مواقع التواصل الاجتماعي عن استنكارها لهاد الأفعال، وأكدت أن أصحابها ماشي وداديين وراه ما عندهم علاقة بالوداد وماشي أي واحد لبس برودوي ديال جمهور الفريق راه ودادي حقيقي، ولكن الوداد ديال بصح هو اللي كيعطي نموذج أنه مواطن صالح وكيتحلى بالروح الرياضية والهدف ديالو هو يشجع الوداد فقط، وكيف ما كانت النتيجة كيتحكم فأعصابو سوا رباح ولا خسارة، ودعات جماهير الوداد إلى تطبيق القانون على أي واحد تأكد أنه متورط فهاد الأفعال وأنه كيمثل نفسو فقط وما عندو علاقة لا بالوداد ولا بجمهور الوداد، وأكدت أن هاد المشاغبين وفحالهم كيستغلو ماتشات مختلف الفرق الوطنية فأي مدينة باش يشرفو ويديرو الفوضى وكيتخباو بالجماهير البرئية منهم.