الوداديين فرحو حيث الناصيري حيد عموتة اللي هز صاكو ومشى يضرب بريكول فكأس العالم

تفاعلو بزاف ديال الوداديين مع قرار سعيد الناصيري رئيس بطل المغرب وإفريقيا بالانفصال على مدرب الحمرا الحسين عموتة، اللي خلى الفرقة هادي 10 أيام، وهز صاكو لقطر يدير التحليل ديال كأس العالم.
وبزاف من جمهور الوداد الرياضي تفاعل بشكل إيجابي على مواقع التواصل الاجتماعي مع خبر انفصال الوداد على الحسين عموتة وهو الخبر اللي كان "كود" أول من نشرو اليوم الأربعاء.
وعبرو الوداد على الفرحة ديالهم بقرار سعيد الناصيري رئيس الوداد حيث حيد الحسين عموتة من الفرقة، واكدو بلي هادشي اللي دار المدرب المذكور ماشي معقول وأن الوداد نادي كبير ومؤسسة محترمة وخاصها أطر كتحترم راسها، وكتوقف على شغلها باش تعطي الاضافة للفرقة ماشي تخلي الفريق وتمشي تضرب بريكولات خارج المغرب.
الوداديين عتبروا الانفصال ديال سعيد الناصيري على الحسين عموتة بالخطوة الإيجابية والقرار الحكيم، حيث ما يمكنش مدرب يخلي الفرقة فهاد الفترة المهمة بالنسبة لها باش توجد لاستئناف البطولة والعصبة اللي مطالبة تحافظ عليهم، ويمشي لقطر يخدم فقناة الكاس القطرية محلل فكأس العالم.
الوداديين قالوا لسعيد الناصيري برافو حيث ما تقبلش عدم المسؤولية فتدريب الفرقة، وبادر باش يبدل الوضع وحيد الحسين عموتة، حيث ما كانوش راضيين على هادشي اللي دار المدرب ملي خلى الوداد وشد الطيارة لقطر، مع العلم أن الناصيري سنا مع المدرب عموتة قبل من دابا بشي 4 أشهر بطلب وإلحاح من جماهير الوداد وتنازل وميك على خلافات سابقة مع نفس المدرب باش يدير الخاطر لجمهور الحمرا.