الوداد الدار الكبيرة.. الناصيري واقف مع مؤيد اللافي وكيحترم قرار المدرب النفتي

من المنتظر توجد إدارة الوداد الرياضي حل للدولي الليبي مؤيد اللافي بعدما وضعو المدرب المهدي النفتي خارج الحسابات ديالو، وصبح صعيب يعتمد عليه فالمرحلة الجايا.
ووضع المدرب المهدي النفتي لاعب الوداد مؤيد اللافي خارج لاليست ديال الحمرا فكأس العالم للأندية، وهادشي كيبين أن اللاعب صبح خارج أيضا، على المفكرة ديالو الشي اللي غادي يخلي إدارة النادي تقلب على تخريجة لهاد الوضع.
وحسب مصدر مطلع فإدارة الوداد كتحترم قرار المدرب المهدي النفتي، بالفعل بدات كتقلب على حل للوضعية ديال اللاعب وأن سعيد الناصيري رئيس النادي ما مخلي حتى حاجة للصدفة، ومن المرتقب يكون اجتماع ما بينو وبين اللاعب والوكيل ديالو، خصوصا أن الرئيس يقدر الوضع ديال اللاعبين وبالأخص اللي كيكونو منهم عطاو للفريق.
وكاينة إمكانية كبيرة باش يقدم الوداد الرياضي عرض المؤيد اللافي بتجديد العقد اللي كيربطو مع الفريق، ويمشي إعارة يرجع الإمكانية ديالو ومن بعدها يلتحق من جديد بالحمرا، وهادشي حيث إدارة النادي كتعرف مزيان الإمكانيات ديال اللاعب وكتقدر الخدمات اللي عطاها لبطل المغرب وإفريقيا قبل ما يتوعت وغتوقف معه باش يرجع للمستوى ديالو.