البرلماني مول غرفة التجارة ديال كازا تجبد فشبكة ديال الكوكايين والحشيش

المكتب الوطني لمكافحة المخدرات التابع للفرقة الوطنية للشرطة القضائية، دار خدمة نقيا، بتنسيق مع "ديستي"، شي ثلاثة الأيام وهو تيحقق مع واحد البارون ديال الكوكايين والطوموبيلات كلاس، بعد ما شدوه في مول ديال الرباط. الضباط ديال الفرقة خواو المزيودة لهاد البارون، لورا مجموعة ديال عمليات تهريب الشيرا لإسبانيا، ودول أوربية، سواء من ميناء طنجة ولا من بين نصار بالناظور، وحتى من الجديدة عبر الطرق البحرية ديال المهربين.
هاد البارون اعترف بصحابو، اللي مشاركين معاه، وكلهم غير من علية القوم، وزعيمهم هو البرلماني حسان البركاني، رئيس غرفة التجارة والصناعة والخدمات، اللي مطعون في الانتخاب ديالو. والقضية مافيهاش غير الشيرا، بل فيها حتى الكوكايين، حيث حجزات الفرقة شي كيلوات فدار البارون اللي كاينة فالرباط. وعندها علاقة أيضا بسبعة كيلوغرامات من المخدر القوي، تقدر قيمته بأزيد من 700 مليون، طاحت فكازا، وتفكيك شبكة تتنشط بين الرباط والبيضاء، في عمليتين متفرقتين، بناء على معلومات وفرتها عناصر "ديستي".
هاد البرلماني الاستقلالي كان مورط في 10 طن ديال الحشيش اللي تشدات في المرسى ديال كازا، ومسؤول أيضا على شي شحنة أخرى قبل 2008، وزيد وزيد.
دابا البارون اللي معروف فالرباط وتينشط في بيع الطوموبيلات هاي كلاس، كمل واعترف بكلشي، وطيح معا هشي وحدين منهم شقيق شخصية معروفة في الرباط، وعضو سابق فالجامعة كان مكلف بالمنتخبات، وشي طاشرونات.
البحث مزال خدام معا كل المتهمين اللي جبدهم البارون،حيث هو العقل المدبر اللي تيتعامل مباشرة مع المزارعين وتيجمع الحشيش، عاد يقلبو فين يعبؤوه ومن تم المرسى.
دابا البرلماني البركاني، راه في التحقيق، والشبكة عندها امتدادات في شمال المغرب وفي أوربا.