مصدر مقرب من حكيمي ل"كود": ها الحالة النفسية ديال أشرف من بعدما اتهموه باغتصاب فتاة بفرنسا

كيستعد الدولي المغربي أشرف حكيمي نجم باريس سان جيرمان الفرنسي، للعودة إلى اللعب مع الفريق، ابتداء من نهاية هذا الأسبوع والمورال ديالو طالع وهو ناشط، وكاعما هاز الهم للاتهامات اللي توجهت له بالاعتداء الجنسي على فتاة.
مصدر مقرب من أشرف حكيمي كشف لموقع "كود"، أن الدولي المغربي نجم باريس سان جيرمان الفرنسي، برا تماما من الإصابة اللي كان كيعاني منها خلال الأيام الماضية، واللي بسببها توقف على اللعب، وأن النجم المغربي واجد باش يلعب ابتداء من الويكاند المقبل فماتش PSG وفريق نانت ضمن الدورة 26 من البطولة الفرنسية.
وبخصوص الحالة النفسية ديال أشرف حكيمي من بعدما تلقى خبرين البارح الاثنين واحد سيء كيتعلق بما نشرته جريدة le parisien الفرنسية عن تهمة موجهة له باغتصاب فتاة، وآخر زوين من بعدما ربح جائزة أحسن تشكيلة فالعالم لعام 2022، وتم الأختيار ديالو مع أفضل 11 لاعب بالعام، فنفس المصدر أكد أن المورال ديال اللاعب طالع وناشط وفرحان والتركيز ديالو على العودة للتيران باش يلعب.
وأكد ذات المصدر ذاتو، واللي قريب من أشرف حكيمي، أن النجم المغربي واثق فراسو بزاف وأن كل ما راج فالإعلان الفرنسي عن اعتداء على فتاة هو عبارة عن اتهامات ملفقة له وصافي، وزاد أكد بلي حتى الدار ديالو اللي ذكرت الجريدة الفرنسية أن الفتاة كتقول بلي حكيمي استدرجها لها وفيها قام بالاعتداء عليها فغياب مراتو واولادو الاثنين، راه فيها كاميرات مراقبة وفيها حراسة وهادشي مخلي النجم المغربي مطمئن ومرتاح فهذه القضية اللي خلقت البوز من البارح بفرنسا والمغرب.
وكانت جريدة le parisien الفرنسية نشرت البارح الاثنين، خبر كتقول فيه أن السلطات بفرنسا فتحت تحقيقا في قضية فتاة تتهم الدول المغربي أشرف حكيمي بالاعتداء عليها جنسيا، وأن الفتاة المذكورة هي شابة فعمرها 23 عان وقامت بإبلاغ السلطات الأحد اللي فات بأن حكيمي تعرف عليها بأنستغرام وعرض عليها للدار ديالو ملي كانت مراتو واولاد الاثنين بدبي، وتكرفص عليها ملي رفضت أنها تمارس معه الجنس.