صراع كبير فكواليس الأحزاب ببني ملال على المقعد البرلماني ديال احمد شدا ومصدر ل"كود": "التحالف الحكومي حرج عادل بركات رئيس الجهة ومنسق البام

من بعد ما تم الإعلان من طرف وزارة الداخلية على أن يوم 27 أبريل 2023 هو التاريخ لي غادي تجرى فيه الانتخابات الجزئية لملء المقعد الشاغر بالبرلمان فبني ملال، ديال احمد شدا لي تم العزل ديالو بقرار من المحكمة الإدارية، غادي يكون إيداع ملفات الترشيح ما بين 9 و13 أبريل، والحملة الانتخابية غادي تنطالق ما بين 14 و26 أبريل.
مباشرة بعد الإعلان علىى يوم الاقتراع، حتى بدات التحركات داخل الأحزاب فالكواليس، باش تقدم المرشح ديالها، ولكن هاد التحركات فيها بعض الضغوطات والالتزامات لي مفروضة على بعض الأحزاب.
فمثلا، يقول مصدر سياسي ل"كود"، إن "حزب التراكتور لي تايقودو عادل بركات منسق البام بجهة بني ملال ورئيس جهة بني ملال خنيفرة باقي ماعلنش على أي مرشح، وتايروج بلي بركات قاليهم إن القرار بيد المكتب السياسي للحزب، ويقدر يكون توافق بين الأحرار والبام، طبعا لأن الأخير داخل في تحالف مع حزب الأحرار، وهاد الأخير فبني ملال غايرشح أحد ابرز القيادات ديالو لي ماقدرش يحصل على مقعد برلماني سابقا، وهو عبد الرحيم الشطبي لي يقدر يكون عليه توافق بين الجرار والحمامة. لكن المشكل، يضيف المصدر ذاتو، هو أن بعض القيادات فحزب البام فبني ملال باغا ترشح أعضاء آخرين ومنهم رضوان نظير نائب رئيس الجهة، والبرلماني السابق حميد الإبراهيمي.