كيفاش ولي العهد رجع وزير الاوقاف. واش الامير اللي خاصو يدخل فالبروطوكول ولا مدير التشريفات؟ =الفيديو

البارح الاثنين 17 ابريل 2023 باش كان سيدنا سالى صلاة التراويح وكان خارج من مسجد الحسن الثاني فكازا٬ شفنا كيفاش ولي العهد الامير الحسن مس بيدو وزير الاوقاف والشؤون الاسلامية احمد التوفيق اللي كان تابع الملك٬ فاشارة باش يرجع اللاور. هاد الشي كان منقول مباشرة ف"الاولى". كلشي لمغاربة اللي كانو يتفرجو فهاد القناة شافوه.
https://www.facebook.com/watch/?v=1455191068346561&extid=CL-UNK-UNK-UNK-IOS_GK0T-GK1C&mibextid=2Rb1fB&ref=sharing
نعاودو المشهد. كان سيدنا القدام. هو اللول طبعا. ووراه فليمن وزير الاوقاف وورا التوفيق كان ولي العهد. فليسر ديال سيدنا كان الامير مولاي رشيد. شوية وهو يتقدم الامير الحسن ومد يدو ليسرا باش توقف وزير الاوقاف. الوزير ما عرف باش تبلى. حدر راسو وبان باللي قال "نعام اسيدي" او عبارة ديال سمح لي.
ظاهريا ولي العهد طلب من التوفيق احترام البروطوكول ولكن هادي ماشي من مهام ولي العهد او اي امير. راه كاين مدير التشريفات اللي هو الكولونيل ماجور عبد العالي بلقاسم اللي قبل ما ياخد هاد المنصب كان مكلف بمهمة بوزارة القصور الملكية والتشريفات والأوسمة. ولي العهد يمس وزير ومباشرة٬ ما عمرنا شفناها.
راه هاد المكلف بالتشريفات هو اللي كان عليه يدخل ويرجع الوزير باش كانو خارجين. اييه اللي خاصو يكون على يمين الملك هو ولي العهد وعلى يسارو الامير مولاي رشيد ووراه الامراء ومسؤولي الدولة الا ايلى كانت شي حاجة غادية تقدم لسيدنا ديك الساعة كيطلبو من الوزير المعني او المسؤول المعني يكون قريب باش يشرح ويفسر ويقدم الاجوبة.
ولي العهد عطى صورة كلها وكيفاش فسرها فالنقاش اللي داير فوسائل التواصل الاجتماعي. المهم خلق الرواج والنقاش بجوجهم.
رابط الفيديو