ها كيفاش بدات فاجعة "سوق الرصيف" ففاس وها آش قالو التجار على هاد الكارثة اللي رزاتهم فرزقهم

عاش تجار سوق "الرصيف" قلب المدينة العتيقة لفاس، مساء اليوم الثلاثاء، لحظات مرعبة وعصبية جراء اندلاع حريق على محلاتهم اللي كانو كيبيعو فيها لخضرا والديسير وبعض المواد الغذائية الأخرى وحتى اللحم والحوت وغيرها.
https://www.facebook.com/watch/?v=417001320253085&extid=NS-UNK-UNK-UNK-IOS_GK0T-GK1C&ref=sharing
لمدينة واقفة وهادي أشهر باش دخلات التجارة للإفلاس وهاد الفاجعة زادت دمرات لينا نفوسنا. بهذه العبارة يتحدث تاجر مع "كود"، وأضاف باللي الصدمة صابت التاجر البسيط اللي كيبيع ويشري باش يدخل لولادو طرف ديال الخبز.
العافية حسب شهود عيان ل"كود" انتشرت بحال النار فالهشيم. انتشرت بسرعة كبيرة. بغاو عدد من التجار يطفيوها ويسيطروا على الوضع لكن الأمر كان كبير عليهم وتطلب إبلاغ الوقاية المدنية على الخط المجاني 15 واللي وصلو معطلين من الثكنة ديالهوم بطريق بمكناس في اتجاه الرصيف القلب النابض ديال المدينة العتيقة.
البومبية، حسب مصادر "كود"، تمكنت من السيطرة على الوضع، مسجلة خسائر مادية جات على اكثر من 22 محل تجاري، دون تسجيل خسائر بشرية. لكن هاد الفاجعة زرعات الرعب بين سكان المدينة العتيقة وكان تعاطف كبير مع التجار المتضررين سواء من طرف الساكنة أو من قبل رواد مواقع التواصل الاجتماعي.
بعض الأخشاب كانت دارتها وكالة إنقاذ فاس في إطار المشروع الملكي لترميم وتأهيل النسيج العتيق للمدينة العتيقة لفاس حتى هي تحرقات. هادشي دفع بوالي جهة فاس مكناس سعيد زنيبر باش يجي يشوف بيديه شنو كاين.
وعلمت "كود" أن الوالي زنيبر طلب من المقاولة اللي عندها علاقة ب"وكالة إنقاذ فاس" باش التدخل السريع باش يصلح أي حاجة داخلة في إطار مشروع تأهيل النسيج العتيق للمدينة القديمة، وسط حديث عن تعويض جميع المتضررين من هاد الفاجعة.