عصابة كتشفر الماگن اللي ب80 مليون وكثر طاحت فكازا. افتاعلو مضاربة فريسطو كازاوي وطيرو لواحد ماگانا غالية والسيد طلع غير مسلفها – فيديو

رابط الفيديو هنا
https://www.facebook.com/watch/?v=1956194521257010&extid=NS-UNK-UNK-UNK-IOS_GK0T-GK1C&ref=sharing
صدفة قادت لتوقيف عصابة متخصصة فشفرة لماگن الغاليين فكازا باي نايت. اعضاء العصابة وفق مصادر "كود" تشدو فمطعم "لوبيري" بالعنق فكازا قبل اسبوع.
الفيلم بدا وفق مصادر "كود" باش هاد افراد العصابة اللي كيمشيو لكاباريات ومطاعم كازا اللي كتخدم بعد لطناش دالليل وكيختارو شي ڤيكتيم كيف وقع فمطعم بعين الدياب.
غاديين يشوفو ماگانا فيد واحد السيد عندو طونوبيلة واعرة. قناو عليه وغاديين يختالقو مضاربة وفيها طيرو ليه الماگانا. هاد السيد طلع غير كاريها مع الطونوبيلة وثمنها 80 مليون سنتيم. السيد مشى ديكلارا ومع ديك لمضاربة تسجلات ففيديو المراقبة فالمطعم تعرفو اعضاء العصابة.
البوليس قرقب عليهم فمطعم "لوبيري" ومعاه كتاشفو انهم كينصبو حتى على اللي باغي الدوڤيز فالصبليون او فرانسا او غيرها من المدن الاوربية.
تقنيات هاد العصابة انها تاخد لفلوس بالدرهم فالمغرب ودير تاريخ باش تسلم مقابلهم بالاورو. لكنهم كيكونو موجدين٬ غير السيد كياخد لفلوس كيتبعو شي حد اخر وكيطير ليه ديك البراكة ديال الاورو.
القضية غادي يدخل فيها مكتب الصرف وحتى الديوانة٬ لان هاد السيد اللي تشفرات ليه الماگانا غير كاريها من واحد كيبيع لماگن الغاليين كونتر بوند. ما كيخلص ضرائب ما عندو محل ولا والو.
عصابات اخرى غادية تبان فهاد الفيلم..