حقارة يتيم. كيفاش هاد الاسلاميين كانو فالحكومة وعلاش ما يتعلموش يديرو السياسة كيف سيدهم بنكيران. وزير سابق كيشمت فاخنوش حقاش ضاراه ركبتو وهو عارف هاد الشي

صعيب توصل بيك الحقارة بالطريقة اللي وصلات لوزير سابق اللي هو محمد يتيم وزايدون مصدعينا بحزب اسلامي. اهم حاجة ما فيهش وهي الاخلاق. دابا يتيم اللي ما عمرو حل فمو ولا هدر على الشأن العام لقى غير صلاة التراوح البارح فمسجد الحسن الثاني فكازا اللي حضرها سيدنا٬ باش يقلي السم لعزيز اخنوش رئيس الحكومة.
سمعو اش دار هادا اللي كان وزير فحكومة "صاحب الجلالة". بارطاجا اولا تدوينة كلها حقد ومرض. فيها شي حد من حزبو وقبيلتو الدينية كيقول باللي "اول مرة" فحياة هاد الانسان شاف "شي واحد ساجد وحاط يديه على وذنيه" وبغى يبان ساخر ربط يديه علي وذنيه بعدم سماع مطالب الشعب.
بارطاجا هادي يعني كيدعمو وكيوافقو ويساندو٬ وهو عارف باللي ايلى كان عندك الام الركبة حتى باش كتسجد كيدير الطريقة اللي دارها اخنوش.
الفيلم ما سالاش هنا. جا يتيم بعدها بدقيقة ودار وحدة احقر: "بعيدا عن السياسة" وفيها قال باللي بركة اخنوش "خلال التشهد" قد ترجع على ما يظهر إلى سبب صحي ( l althrose) أو ما يعرف بتخشب المفاصل .. والذين يعانون من هذا المرض قد يتفهمون حالة رئيس الحكومة في صلاة التراويح بالأمس" وزاد باسلوب خبيث "وقد يكون هناك سبب آخر للحالة التي ظهر عليها السيد أخنوش"
بغى يكول غاضب عليه الملك او داير فيه. دابا هادا كان زميل لاخنوش فالحكومة وعارف باللي عندو مشكلة فركبتو هادي سنين ماشي اليوم وبدا بهاد الاسلوب المنحط "قد" و"قد".
وسالاها باسلوب احط "والعبرة أن اعتلال الصحة وما قد يصيب الإنسان من مشاكل صحية يساوي فيه الوزير والمليلردير والمواطن العادي البسيط." وكلها بدعاء.
كيفاش يقدر واحد كيعطي للمغاربة دروس فالاخلاق وكيعتابر راسو من حزب اسلامي يطيح فهاد المستنقع ديال الحقارة.
علاش هاد الاسلاميين بعضهم طبعا٬ ما يتعلموش من سيدهم بنكيران. نهار يعارض كيكون سبع وفامور بحال هادي ابدا واش يدخل او يقرب. سياسي قافز وواعر. خطيئتو انو ما علمش امثال يتيم اخلاق السياسة