سكوب. كيفاش كتضحك الحكومة على لمغاربة. گاليك غاديين يخدمو 20 الف مغربي فالشهر من هنا حتى نهاية 2021. مصدر ل”كود”: هاد المشروع ها شكون اللي قدمو لبنكيران وما بغاش يضحك على لمغاربة ولاحو

رئيس الحكومة سعد الدين العثماني هادي سيمانا قال للمغاربة بلا حيا بلا حشمة باللي حتى نهاية 2021 الحكومة غادية تخلق مليون و200 الف منصب شغل. دابا نساو باللي حنا فماي 2018 اي داز عام و4 اشهر من هاد المخطط اللي فيه 5 سنوات. بعملية حسابية كاين 60 شهر وكل شهر خاص رئيس الحكومة يخلق 20 الف منصب شغل، واش هاد 16 شهر اللي داز بان ليكم خدمات 220 الف او تخلق هاد العدد من مناصب الشغل؟ طبعا اللا. البطالة مازال فمستوياتها المرتفعة اللي وصلات ل10 بالمائة.
دابا هاد الشي ما شادش وهاداك البرنامج اللي سميتو “تمكين” “برنامج التعبئة الوطنية لتميكن الشباب وداخلة فالمخطط الوطني للنهوض بالتشغيل ما يمكنش نبلغوه الا اذا كانت نسبة النمو جوج ارقام اي فايتة 10 بالمائة.
دابا صندوق النقد الدولي قال للحكومة هادي اقل من اسبوع باللي خاصو يدير 6 بالمائة باش يقدر يحافظ على 10 بالمائة كنسبة بطالة اي انه خاصو نسبة نمو كبيرة باش يخلق هاد مناصب الشغل.
دابا اجيو نشوفو هاد الكذبة منين جات. حسب مصدر “كود” فان هاد المشروع سبق للوزير ديال التقدم والاشتراكية عبد السلام الصديقي ان قدمه لرئيس الحكومة انذاك عبد الاله بنكيران. وفق مصدر مقرب من الوزير الصديقي ل”كود” فان بنكيران لم يقبل به “كان عارف باللي يستحيل يتحقق هاد الشي وما بغاش يضحك على لمغاربة” يشرح مصدر “كود”.
دابا جا هادا بغى يضحك علينا بهاد المشروع