محامي القصر الناصري: مرافعتك ضعيفة والقضية ماشي قانونية راها سياسية وماشي باش تعتق صاحبك الماجيدي اللي خاصو يحشم على عراضو ويمشي فحالو: راه الفضيحة ماشي تشري زورق ولا دار ولكن تستثمر ف"اليانس"

اجوبة محامي القصر هشام الناصري على تسريبات "اوراق بنما" اللي تجبد فيها الماجيدي عبر شركتي "اس ام دي سي" و"اوريون" واللي شرا منهم زورق ودار٬ اجوبة تدين محمد منير الماجيدي مدير الكتابة الخاصة للملك. تظهر انه غير كفء لتحمل المسؤولية. غير كفء لمن ائتمنه على مصالحه وصورته وصورة المغرب.
المحامي قال اليوم في "اخبار اليوم" ان "المندبة كبيرة والميت فار" باش يميع هاد الشي. وطبزها اليوم باش كال باللي كلشي دار مرافعة قانونية وكال باللي كلشي داز فشفافية. السي المحامي القضية ماشي قضية شفافية ومعاملات. لمغاربة عارفين ملكهم ما كيتسناوش واحد بحالك يكول ليهم هاد الهدرة. القضية ماشي قانونية يا السي القانوني. القضية سياسية.
اولا اللي كيشرف على شي حاجة عندها علاقة بالملك محمد السادس خاصو يعرف باللي كيشرف على شي حاجة كتمس صورتو وصورة المغرب. خاصو يبعد عن كل حاجة فيها شبهة. ومشى حتى لبنما اللي كلها شبهة. شبهة حقاش كيمشيوا ليها ناس المافيا وشفارة كبار. هادو واخا يمثلو غير 1 بالمائة ما خاصش واحد مكلف بالثروة ديال الملك يقرب ليها.
انت فجوابك على سؤال "ميديا 24" كتكول باللي اللي كيمشي لهاد شركات "افشور" كاين اللي نيتو سليمة وكاين اللي مدان اللي كيتخبى "ورائها بشكل عام نية أو مشروع احتيال أو تحويل أموال وتهرب ضريبي وعمليات مشبوهة الخ..وفي هذه الحالة تم توجيه الاتهام لعدد من الأشخاص في عدة مقالات منذ بداية الأسبوع". باش يكونو هاد لكمامر فبلاصة خاص منير الماجيدي ايلى كانت كتهمو صورة الملك كيف كتهم كلشي لمغاربة يبعد.
ثم جوابك غير الذكي اللي كتكول فيه باللي "صحفيو لوموند يعلمون ذلك بشكل جيد، لكن نشر مقال بصورة لصاحب الجلالة يبيع اكثر، على الرغم من ان المقال خالي من أي دليل" ما عندو معنى. دابا الماجيدي مع من خدام، راه خدام مع الملك ولمن شرا داك لشي؟ للملك. اذن اي صحيفة فالعالم محترمة ومهنية غادية دير صورة الملك. كون بغيتي صورة الملك ما تكون٬ كون هاداك الماجيدي دار احتياطاتو قبل.
نقطة اخرى كتكول باللي كلشي ما فيهش "أي نية للاخفاء، بل على العكس، كل شيء يتم بالوضوح". مرحبا ولكن اللي ما فيه اي نية للاخفاء علاش تأسيس شركات فجنات ضريبية؟ وعلاش تخبية وعلاش ما تكونش شركة من المغرب تشري هادك الشي مباشرة؟
نزيدك نقطة اخرى٬ كتكول باللي "لا يسمح السكرتير الخاص بالملك ابدا بالقيام بها ويلتزم باحترام القانون والتدقيق الضريبي" وباللي ""الماجيدي باعتباره رئيسا للهولدينغ الملكي فهو الذي يدبر الثروة الملكية. مهمته هي التدبير يشكل جيد كما يقوم به أي مسير مجتهد وذكي، دائما في اطار الالتزام بالقانون والشفافية، الى جانب مستشارين ومهنيين في القطاع". ماشي بصاح والا ما كانش صحف العالم كلها خاصة فرنسا كتجبد الملك وكتربطو بهاد القضية اللي طيحات رئيس حكومة دابا والبقية جاية.
علاش السي الناصري كدافع على الماجيدي اللي مسؤول على الحفاظ على صورة الملك ماشي غير بالجانب القانوني ولكن حريص باش ما يدير حتى حاجة تقدر يكون عندها اثر سياسي او اخلاقي بحال هاد "بنما بيبرز".
المشكلة راها سياسية ماشي قانونية اسي المحامي. نزيد نكررها. وخاص اللي يكون فهاد المنصب يكون قاد بيه. كيفاش كبار مساعدي الملك كيتقاتلو فخدمتهم وكيحمرو وجه المغرب وهاد السيد اسمو ارتبط غير بالفضايح هاد السنوات الاخيرة. اذن الماجيدي خاصو يمشي فحالو حقاش ما حافظش على صورة ملك المغرب
واخيرا وهاد الشركة "اس ام دي سي" علاش شراو بها اسهم ف"اليانس" ديال العلمي الازرق فالمغرب؟ نخليوك انت تكول لينا اش تسمي هادا وحيد لي الجانب القانوني