منتخبات ” سبعيام د الباكور ” لا تروقني ..

الجزائر غادا تلعب الفينال ديال الكان 2019 فحال اللي لعبو المغرب ف 2004 .. بلماضي استطاع أنه يجمع فرقة جيدة و يصنع لها طريقة لعب جميلة .. فحال الزاكي اللي خلط التشكيلة بدراري محليين مع اللي تزادو على برا و استطاع يخلق الإنسجام بيناتهوم و يمشي بعيد فالكأس !
و لكن بكل صدق ما غاديش نكون متحمس لفوز الجزائر كثيرا واخا عندي أصدقاء جزائريين بزاف لا أفرق بينهم و بين المغاربة و كنتمنى نشوفهم فرحانين نهار الجمعة المقبل !
علاش .. لأنه باش تكون مشجع ديال منتخب ما ، خاصو يكون هاذ المنتخب جايب على الأقل واحد العشرين عام دائما كتجبرو حاضر فالنهايات و لا كيدي الكؤوس القارية و كيمشي للمونديال بصفة مستمرة و عندو منتخبات الأولمبي و الشبان و الفتيان كتحصد الأخضر و اليابس و كيعطيواك لعابة عالميين كل سنة .
ما غاديش نكون متحمس بزاف لفوز الجزائر لأنه سبقنا تحمسنا و فرحنا مع المنتخب ديالنا فتونس 2004 و من موراها جبنا 15 عام ديال الفقصة و الطونسيون و التبهديلات .
الجزائر مشات لمونديال 2014 و دارت نتيجة مزيانة بتأهلها للدور الثاني و إحراج منتخب كبير كألمانيا ، لكن من موراها فكأس إفريقيا طارت من الدور الأول على يد منتخبات ضعيفة و سقطت اتحادية الكرة في مشاكل الصراعات و الفساد .
المغرب و الجزائر عجينة كروية وحدة … ما عندناش الريحة ديال الكرة فالبلاد و الصدفة و جاليتنا بالخاريج كتعطينا مرة مرة شي منتخب اللي نخلقو بيه بعض الفرح المؤقت و ندرقوا بيه على بشاعة الواقع !!
و لأن منتخبات ” سبعيام د الباكور ” لا تروقني .. سأتفرج بلا تعاطف مع أحد !