آل باطما: من العربي الأسطورة للغربال ديال ابتسام !!

شفنا داك النهار ابتسام باطما خارجة من الحبس. مبروك آللا وكفارة ياجدع ولا ياجدعة بحال اللي تيقولو المصريين، ولكن انتبهنا لواحد اللعيبة نقلاتها بزاف ديال المواقع هي شي غربال ما غربال زطمات عليه ابتسام قبل ماتركب فالطوموبيل باش زعماتيكا آسيدي ماتعاودش تدخل للحبس
طبعا حنا دابا فالعام ديال واحد وعشرين من بعد الألفين، والبشرية تقدمات ووصلات حتى للمريخ وبدات كتسيفط التصاور من تماك. ولكن معانا شي عقليات متخلفة باقية عايشة فعصور الجاهلية، وباقية كتآمن بخرافات حشومة نروجوها على بلادنا ومنين البراني كيعايرنا بيها كنتقلقو
بغينا نقولو فالساخرة اليوم أن المصير ديال السمية الأسطورية ديال باطما حقيقة ولا كيألم. المغاربة عرفو العربي واحد من كبار الشعراء والفنانين المغاربة وعرفو محمد وحتى هو مشا على النهج نفسو، دابا عيب وعار يتم تشويه هاد السمية الكبيرة بهاد الشي كامل من حمزة مون بيبي حتى للغربال