نتائج الامتحان الوطني لنيل 3.7 مليون في الشهر

(ملحوظة هامة : الامتحان حطو الأستاذ ساهل وحتى العتبة نقص منها ولات هي% 3.. يالله غير نجحو…غير ديرو شي حاجة لهذه المدرسة)
القسم كان فيه شي 32 تلميذ:
المرتبة 1: التلميذ عبد الإله اللامبة 12.5.. تلميذ كيحضر ديما وكيكتب كاع الدروس وكيجي ديما مع 7h للمدرسة وكيبقا ديما حتي 18h.. معروف عليه كيكتب بيد وكيضرب بيد… كسر قاعدة أن التلاميذ المجتهدين كيكونو خوّافة.. مكنين عليه فالمدرسة عبد الإله بودراع..
المرتبة 2 : الدكتور الياس 10.2… تلميذ كسول ولكن نقااااال.. قدا غرض بشي حروزة مكتوبين ف 200dh. وصاحب المدير. كاع الخدامة ديال المدرسة واقفين معاه.. مكنيين عليه "للي حرثو التراكتور دكّو".
هادو هوما لي جاوبو المعدل…أما فيما يخص نتائج الكائنات الأخرى لي فات مستوى الكسالى بكثير:
المرتبة 3: حميدان لميزان 4.6… فهاد الامتحان دخل سوق راسو مزيان حيت عندو إنذار فات خرج من القسم ورونها ميزيان.. وهرّس الميزان.. ما كيتحاملش مع عبد الإله بودراع حينت ماكيبغيش يدوّقو من الحلوة في الحفلة ديال آخر السنة… كنيتو "مسيو 10 في المائة"…
المرتبة 4: حمامة الفعفاع: 3.7.. تلميذ أنيق غير هوا ديما مسافر ماكيحضرش بزاف… وكون الامتحان جا السبت بالليل كان يجيبها على "بودراعو".
المرتبة 5: نسيب حليمة: 2.7.. تلميذ مواظب.. معزيزش عليه المشاكل.. حدودي ماكيدوي مع حد.. غير يلا جاه شي تلفون تلقاه مفتون. مكنيين عليه "السنبلة الوديعة".
المرتبة 6: مول الوردة :02 .. هو الكسول فالعائلة للي ماتو أغلب أفرادها.. شكارتو ما فيها لا كتوبة لا والو.. ديما عامرة غير بالقص.. كنيتو ادريس بوكتف.. للي دوا يرعف".
المرتبة 7: محمد العود :01.9… كان مجهد فالجرا.. ماعندوش مع الستيلو والورقة.. كان كيجيب مزيان ومنين مات العلاّف عيا ليه العود، وهو ياكل كازا كلها. كنيتو "ساجد ما ساجد".
المرتبة 8: نبيل الموسطاش: 1.2… تلميذ ديما هاز الكتاب وهاز الهم باش يولي عندو قسم كبير، ساعة كيزيد غير يصغار. صيفطو المدير فالعطلة للطاليان وهو يقطع الفران ورجع للمدرسة كعيان ودار يدو فيد عبد الإله بودراع وزطم مزياااان، وهو يخرج ليه المدير زعفان.. نهض فيه وفالامتحانات الأخيرة خرج عليه.
2 أو 3 من نفس القسم جابو الأصفار.. و اكثر من 22 تلميذ غبروا بحال لا ماعمرهوم كانو بالقسم.