مسرحية هزلية باللسان الدارج : "العب تربح العب تخسر "

المسائية الفنية
الكاتب والمسرحي : محمد بن إدريس الكاتي

(عبارة عن ساحة واسعة، ترى العين امتداداتها عبر الأزقة، والمنازل، والمتاجر، والمساجد، والصوامع… التي رسمت على جدرانها… الممثلون يشكلون حلقات صغيرة، كل حلقة تمارس لعبة من الألعاب التالية: العيطة – الضاضوس- الصفيرة مولات المال- بيع الدواء- الشواف (ة)… تسلط الإضاءة على المساحة المخصصة لكل لعبة).
الشوط الأول
*لعبة العيطة *
(كارطة + طاولة صغيرة علوها 80 سم – إنارة)
ممثل (1) : (يضمس الكارطة، يضعها أمام ممثل (2))
انت وْزهرك، عيط
ممثل (2) : (يفكر).
ممثل (1 : أعيط.
ممثل (2) : الكبال.
ممثل (1) : سِرْ، هانا، الاَّ، ها هو، اشكون يْزيد؟.
اشكون يركب؟ الطْلامس، ها هو، خارج، ابصحتك.
ممثل (2) : (يتسلم الكارطة، يضمسها، يضعها أمام الممثل (1)) عيط.
ممثل (1) : اللاص.
ممثل (2) : كلا وْ زهرو، الطْلامس، هاهو، الا، اشكون يزيد؟ ها واحد لمية، اشكون يزيد؟ أزعم أصاحبي، هانا، خارج، داخل،/ ازگلتيه.
*لعبة الضاضوس*
(ضاضوس + علبة + طاولة صغيرة علوها 80 سم "إنارة").
ممثل : (يحرك الضاضوس) ساعة الحظ ما تتعوضش، يا الله عمّر واربح،
جرب حظك واربح، ازعم، كلشي يربح، ازگلتوها (يحرك الضاضوس) مرة اتْصيب، ومرة اتخيب، مول السعد يْعمّر، عمّر وارْبح، ارْبح، ارْبح، ابصحتك، (ظلام).
*لعبة الصفيرة مولات المال*
(ثلاث ورقات كارطة 2+ 4+ السوطة "إنارة").
ممثل : (يلعب بثلاث ورقات) الصفيرة مولات المال، انت وزهرك، ها انت، رد بالك، 100 تربح 400، 1000 تربح 4000، ها انت شوف مزيان، هاذي ألا، هاذي الا، يا الله اشكون احضاها؟ اشكون صاحب الحظ؟ ازگلتيها (يعيد) ما اتقلقش يوم ليك، و يوم عليك، ها انت، رد بالك، هاذي الاَّ، هاذي الا، يا الله اشكون احضاها؟ ابصحتك (ظلام).
*لعبة بيع الدواء*
(بساط + علب بداخلها مسحوق أعشاب+ قنينات صغيرة، بداخلها سائل… "إنارة").
ممثل : سبْحانو، اخْلق البلاء، واخلق الدواء، سبْحان الشافي، سبحان العافي، اسيادنا، اللي ما دار السْباب، اخطا الصْواب، اسيادنا، اللي نيتو ناقصة، يْبعد، اللي لا بسو ابْليس، يْبعد، اللي نيتو صافية، يتقدم، مول بو زلوم، مول احْريق البول، (يتناول علبة) هانا، گول بسم اللهْ، خلط بالزيت البلدي، وكول، حرك جيبك، يتستر عيبك، واللي ما عندو نية، ما عندو قسمية، سبحان الشافي، سبحان العافي، جاك الخير اسيدي، جاك الخير امرضي الوالدين (ظلام).
ممثل (إنارة) كنديرو السْباب، والكمال عْلى مولْ الْملك لَعْظيم، سبحان الشافي، سبحان العافي، عندك برد الظْهر، ولاَّ نفسك باردة، ادواك موجود إلى كانت نيتك صافية، انوي الْخير تلق الخير، أرى اللي حاگراه لمرا، أرى اللي شاك افْرجو لتو، ها انت (يتناول قنينة) صغيرة) شربو فاتاي اقبل النعاس، يبات اعلامك واقف عساس، الليلة، تبات اتقاتل، السيف مايعواج، ما يحفى، جاك الخير الحاج، جاك الخير الشريف ظلام).
*لعبة الشواف (ة)*
(بساط أخضر + مبخرة + احجبة+ سيديات+ بندير+ شواف (ة) مرتديا لباس المهنة، في عنقه سبحة كبيرة، + مساعد … ) (انارة )
الشواف : (للمساعد) أرى لبنادر، أرى التباخر.
المساعد : (يضع البخور في المبخرة، ويضرب على البندير).
الشواف : أرى لبنادر، أرى التباخر (يتناول كتابا قديما) ها الزناتي، ها الضمياطي، ها بركة الهادي.
المساعد : (للجمهور) اللي تالف، وْما عارف اش من اطريق يْشد؟.
الشواف : لجواد يْر شدوه.
المساعد : اللي ابغى يعرف، امنين جايو لعكس؟.
الشواف : لجواد يْوريوه، ها الزناتي، هالضمياطي، ها بركة الهادي
المساعد : اللي امعكس ليه الزواج؟.
الشواف : لجواد يسهلوه ليه (يتقدم زبون، يهمس في أذن الشواف).
الشواف : (يمسك يد الزبون) أطلب التسليم لا تحسب، لا اتقدر، هاذ لحجاب علقو جهة ليمين 21 يوم، يزول لعكس، ويبين ليك البرهان، ها الزناتي، ها الضمياطي، ها بركة الهادي.
المساعد : اللي ابغى يعرف اعلاش ما عندو ازهر امْع لعيالات؟.
الشواف : لجواد يْوريوه.
المساعد : اللي امثقف، وخايف من ليلة الدخلة؟.
الشواف : لجواد يْعالجوه (يتقدم زبون، يتبعه آخر، يتبعهما ثالث…).
الشواف: (للزبناء) ابشوية السي، ديرو الصف الله يْخليكم (يمسك يد الزبون الأول) لا تحسب، لا اتقدر، هاذ السيدي، اتفرج فيه وحدك، 7 اديال الليلات، ها الزناتي، ها الضمياطي، ها بركة الهادي (يمسك يد الزبون الثاني) لا تحسب، لا اتقدر، هاذ السيدي، اتفرج فيه وحدك 7 اديال الليلات (يمسك بيد الزبون الثالث) هاك حتى انت (يسلمه سيدي) دير ابحالهم، ها الزناتي ها الضمياطي، ها بركة الهادي.
المساعد : فين اللي كيفق عليه الحال؟ فين الليل اجناحو مكسو؟ (يتقدم زبون).
الشواف : جاك الخير اولد لجواد، جاك الخير الشريف هالزناتي، ها الضمياطي، ها بركة الهادي (تتداخل، وتتقاطع الألعاب وكذلك الإنارة، بعد برهة، تبدأ الأصوات، والإنارة في الانخفاظ، ينشغل الممثلون بِعد النقود المحصل عليها. (ظلام).
الشوط الثاني
(إنارة – يدخل البراح حاملا حقيبة، مناديا)
البراح : عباد الله، ما اتسمعو الا اكلام الخير، يا أَهل الساحة، ياهَلْ لمكان، يا أَهل الساحة (تقترب المجموعة منه) گال ليكم أمين الساحة، واكبير الجماعة، خصكم تنتخبو مجلس الساحة.
ممثل : واشكون يكون الرايس؟
البراح : الرايس موجود، ابلا ما اتشغلو به بالكم، واتضيعو الوقت
ممثل : ابحال إلى علمك الله.
البراح : وراكم غاديين اتسافرو لَبلاد برا، امع فرقة الصناعة التقليدية.
ممثل : ها الزليج ها الفخار.
ممثل : ها الغيطة ها النفار.
ممثل : هالحصيرة ها الحايك.
ممثل : ها الناعورة ها القرشال.
ممثل : ها الحنة ها الزربية.
ممثل : ها البلغة ها الشربيل.
ممثل : ها القفطان ها العمارية.
ممثل : ها البرشلة ها الجمور.
ممثل : ها لحمالة ها السبنية.
ممثل : ها النقرا هالخلخال.
ممثل : هالمضمة ها جبدور.
ممثل : ها السلهام ها الكمية.
البراح : وغاديين اتسافرو امع فرقة الطقطوقة الجبلية (تؤدي المجموعة أحد مقاطعها).
البراح : وامع فرقة العيطة المرساوية (تؤدي المجموعة مقطعا…).
البراح : وامع الفرقة العيساوية (المجموعة تؤدي مقطعا…).
البراح : وامع الفرقة الحمدوشية (المجموعة تؤدي مقطعا).
البراح : وامع فرقة الدقة المراكشية (المجموعة تؤدي مقطعا منها).
البراح : راكم غاديين اتمثلو لبلاد، واتجلبو لعباد، اللي عاشقين الشمس، ولهوا، واللي على بالكم، بالگرجا.
المجموعة : يْفيض الخير، تفرح لقلوب، واتعم البهجة.
البراح : وبعد ما تنتخبو المجلس، ويحضر الرايس، واتدربو مزيان.
ممثل : واشكون غادي يدربنا ؟
البراح : الرايس، هو المخرج، اللي غادي يشرف عْلى التداريب، وبعدما اتدربو مزيان، واتقنو ادواركم، نبغيو الشعار الأول: اتكون النهايات فَجْميع اعمالكم، كيف العادة:
المجموعة : تفاهم الجميع / توافق الجميع.
البراح : ويكون الشعار الثاني:
المجموعة : اللي اترهنو بيعو.
البراح : واللي اتخدمو.
المجموعة : طيعو.
البراح : واللي فرط.
المجموعة : مايلوم الا راسو.
البراح : واللي ما يسمع لكبيرو.
المجموعة : الهم تدبيرو.
البراح : ويكون الشعار الثالث: مولْ لَبلا خليه فَبلاه.
المجموعة : لا اتهز، لا اتحط امعاه.
البراح : الناس اجناس.
المجموعة : فيهم الماس، وفيهم النحاس.
البراح : ويكون الشعار الرابع:
المجموعة : اليوم اكلينا، واشربنا.
البراح : وانسينا.
المجموعة : ماداز اعْلينا.
البراح : الحاضر، يبلغ الغايب، اللهم إني قد بلغت، اللهم فاشهد، ها الدوزان. (يشير إلى الحقيبة) وها الاصوات (يشير إلى الجمهور) (يغادر).
ممثل : اللي يْريدك، ريدو، ومن خيرك زيدو.
ممثل : اش اظهرليكم المعلمين؟
ممثل : كيفاش، اش اظهر لينا؟ تفاهم الجميع/ توافق الجميع
ممثل : واللي فرط
المجموعة : ما يلوم إلا راسو
ممثل : واش انديرو امع اللي ما حضرينش ؟
ممثل : واش انت غادي تبقى ديما بوجادي ؟
ممثل : كيفاش؟
ممثل : كيف العادة، غادي انكولو باللي اتبلغو، وما حضروش
ممثل : يتحملو مسؤوليتهم.
ممثل : واللي ضرباتو يدو ما يشكي
ممثل : يا الله اسيدي على بركة الله، أرى هذاك الدوزان (موسيقى للتشويق)
ممثل : (يفتح الحقيبة، ويخرج منها صندوقا، وقلما، ومحضرا للتوقيعات، وكيساً فيه بي ملون، تهدأ الموسيقى التشويقية، وتنطلق موسيقى غريبة، غرابة العملية التي ستجري، يتولى ممثل ملء المحضر، بينما بقية الممثلين يلعبون اقريقشة، ويخبرونه في كل مرة بالنتيجة، ليسجلها في المحضر، بعد الانتهاء من ملء المحضر، يدخل البراح ومعه الرايس، حاملا حقيبة، تهدأ الموسيقى، يتوقف اللعب).
البراح : عباد الله، يا أهل الساحة، ها الرايس اديالكم (يتقدم أفراد المجموعة للسلام عليه، على نغمات موسيقى أندلسية، يتسلم البراح الصندوق، والمحضر، ثم يغادر، تهدأ الموسيقى الأندلسية).
الرايس : (على نغمات اهازيج مغربية، يفتح الحقيبة، ويخرج منها ملابس التمثيل، والملحقات، وحاسوبا، يوزع الملابس على الممثلين، ويشرف على ارتدائها، كما يعين أماكن الممثلين، بعد رسم الحلقة، التي ستجري فيها أحداث المسرحية، وتقديم التوجيهات، اللازمة، للممثلين، بعد تقسيمهم إلى نواب، ووزراء، النواب في جهة، والوزراء في الجهة المقابلة، والرايس في الوسط، تهدأ الموسيقى، (ظلام)
(لحظة كواليس).

يتبع