اشرب يا أقصى بصحِتَكْ

محمد حرب الرمحي
ل محمد حرب الرمحي
-------------------------
طرحة عروس ونار مجوس
زفة تلج ابيض مجروح
قصة امل بيغزِل شَمِع
والليل عم يجمَع دَمِع
والصمت من وجَعِ الفرح
بالآآآآآآآآه جرحو عم يبوح
ما فيك تبكي الدمعتين
بعدو المطر اخرس ضرير
ولا فيك تخفي بنظرتين
محبوس بحريته أسير
الجوع عم ياكُل فقير
وفستان بيعرّي جسد
ئولَك اذا صام الضمير
العيد بوصَل هالبلد
الدم عم يلحس رُكَب
والتِم عم يشرب دَمِع
ولسه الولد بعدو ولَد
بعِز الشتا وعِز المطر
النار ولعاني خَشَب
وما في سبب للي انجرح
غير انو يشرَب دمعتو
يسكر بساعات الصُبح
وصبر الأرامل خمرتو
وبعدو السبب هوي السبب
تابوت جثمانو حطب
والنار بتغلي بجثتو
الأقصى عمالو يصيح
والنار وصلِت للمسيح
والمُعتَصِم ما عم يرِد
مشغول يمكن بالنَرِد
او شي صبيه عالوَعِد
بعيونها مليون جريح
اشرَب يا اقصى حسرتَك
وداري بكاسَك دمعتَك
ما ضل عرب ولا مسلمين
أشرب يا أقصى بصِحِتَك