شكون هو المجرم :الحلقة الخامسة

حل الحلقة الرابعة:
ملي دخل لاجودان لمسرح الجريمة لقى الساعة ديال لوزين طايحة على الارض وساكتة عند التسعود ديال الليل وملي سول المساعد ديال الكيسور قال بلي الوقت للي وقعات فيه السرقة كان عند صاحبو من التسعود ديال الليل حتي للوحدة داكشي للي خلا لا جودان يعرف بلي الساعة ديال لوزين طاحت فالوقت للي وقعات فيه السرقة وسكتات والمساعد ديال الكيسور مايمكنش يعرف وقت السرقة الا الى كان هو لي دارها
الحلقة الخامسة:
فلا بريكاد عند الجدارمية جا السيكوريتي ديال المقتصدية كايشرح للاجودان ديال الجدارمية كيفاش وقعات السرقة فالمقتصدية وقال: شفت المخار أمون ادجودان بعيني شفتو وهو كايحنقز من الشرجم ويجري وما قديتش نتبعو علاحقاش الدنيا مظلمة بزاف
ودرت التليفون للجدارمية ومن بعد ماجاو مالقاوش أثر للمخار .مشا لاجودان مع السيكوريتي لغرفة التوقيف بلابريكاد ووراه مجموعة من المشبوهين وسول لاجودان السيكوريتي :واش المخار للي شفتي بعينيك كاين بين هادو؟
شاف السيكوريتي مزيان فالمشبوهين للي واقفين قدامو وشير بصبعو على واحد منهم وقال: هذا هو المخار نعاماس عندي اليقين بلي هو سول لاجودان مرة اخرى السيكوريتي أشنو كان لابس المخار ملي شافو جاوب السيكوريتي لاجودان بلي كان لابس سروال كحل وقاميجة كحلة.
خرج لاجودان من المكتب ديالو ولقا الشاف المساعد يالله نزل من الجيب وقال للاجودان بالكود السري بلي المسروقات قيمتها تقريبا ستين ألف درهم وبلي المخار كايعرف المقتصية مزيان وماخلاش البصمات.
اعطى لاجودان الامر باش تكون التحريات على السيكوريتي واصحابه والعائلة ديالو والبلايص للي كايمشي ليها وكانت النتيجة أن الجدارمية لقاو المسروقات كلها مخبية عند جدة السيكوريتي وبلي السيكوريتي هو المخار للي سرق بمساعدة ولد اختو مغني الهيب هوب المشهور بالثانوية.
السؤال علاش شك لاجودان فالسيكوريتي وماقتانعش بكلامو واعطى امر بتعميق البحث عليه؟