بوغطاط المغربي: بوبكر الجامعي يحيي الظهير البربري من جديد... قليل النية ضد لبلاد ما عمرو يطفرو

تحية بوغطاطية للجميع وديما مغرب،
غنعاودها ليكم أخوتي كيف الخرافة.
كنت كيف كاع المغاربة في جميع بقاع العالم، محيح ونااااشط ومن أسعد الناس فالكون وانا كنمتع الشوف فالأسود ونبرد الجوف بالنصر التاريخي ديالهم فمونديال قطر ومنشوي نشوة ماااا بعدها نشوة وانا كنشوف راية بلادي منورة مشعشعة وسط المربع الذهبي ديال كأس العالم وولاد بلادي فارعين ليا البشر وممرمدين ليا لفراقي لكبار ديال أوروبا وكل حكار كان شايفنا شوفة ناقصة، خصوصا الصبليون ولعوقبا للفرنسيس لي شاءت الأقدار ديال سيدي ربي يلاقينا بها باش يعطينا فرصة ثالثة للانتقام (من مور اسبانيا والبرتغال) الانتقام من لي نهبونا وفسدو فأرضنا وقتلو جدادنا وطمعو فخيرات بلادنا.
وسط هاد الإحساس التاريخي، كيطلع ليا واحد الفيديو ديال واحد من وليدات فرنسا لي بغاو يحييو الظهير البربري ديالها لي كانت باغا تقسم به بلادنا. هاد لبلاد لي من ديما كنقول عليها أنها أرض مباركة، من نهار خلقها سيدي ربي، قدر عليها تكون موحدة بكل اختلافاتها وتنوع ثقافاتها ويبقى شعبها ملتاحم وملتف حول عرش بلادو المجيد ورمزها السامي ضد كل الأطماع الخارجية.
الأمر كيتعلق بالمدعو بوبكر الجامعي، رفقة واحد آخر لي لا يقل قذارة عنه فتاعطايت والعمالة للأجنبي وهو فؤاد عبد المومني.
الجامعي مع الأسف، بلغات به الوقاحة بحالو بحال ثلة مرتزقة اليوتيوب لي ولاو كيسميو المنتخب الوطني المغربي ب "منتخب الجالية" و وصلات به الوقاحة أنه يفرق بين أبناء الوطن الواحد وأبناء المنتخب الواحد واستحضر منطق القبائلية وقال لصحاب "منتخب الجالية" ما كتعرفو وااالو، هادا ماسميتوش "منتخب الجالية"، هادا منتخب "منتخب ريافة"، زعما بحالا ريافة ماشي مغاربة.
يعني مثلا نهار المنتخب يكونو فيه 3 أو 4 ديال لعايبية من العيون أو الداخلة غادي نوليو نسميوه "منتخب صحراوة"؟؟؟ أش هاد المنطق التقسيمي الخامج؟؟ أااا عباد الله منتخب من نهار تخلاق وهو سميتو "المنتخب الوطني المغربي"، عشنا وشفنا العطاية والمرتزقة كيقسمو فيه كيف بغاو !!!
هادشي كااامل حيت مفقوص من التلاحم لي عبرو عليها المغاربة؟؟؟ وخصوصا فمدن الصحراء والخروج ديالهم بالملايين فالمغرب كامل، فالوقت لي الوقفات لي كتقيلو تحرضو عليها كيخرجو فيها كميشة ديال الناس؟؟
هادشي كامل حقد حيت شفتو اللعابة كيتقاتلو على الضرابو؟؟ ورفضو كل المغريات لي تعطات ليهم من البلدان الأوروبية لي تولدو فيها وقررو من أعماق قلبهم يرفعو الضرابو ديال المغرب وبدون مقابل أو طمع ما عدا الحقوق المستحقة لي هي براسها كيسمحو فيها ويقسموها على staff ديال المنتخب.
هادي كلها رغبة في نفث السموم باش تفسد الفرحة ديال اللاعبين وديال المغاربة لي خرجو فجميع بقاع العالم يحتافلو بنصر المغرب وتحت الراية المغربية ورافعين شعار المغرب الأبدي: "الله الوطن الملك"؟؟
قالك الجامعي حكا والواد، أغلب اللاعبين ديال المنتخب أصولهم ريافة وتولدو وترباو وتدربو فالخارج (زعما بغا يقول بلي هادو لا علاقة لهم بالوطن) وأن هاد الريافة كيكونو زوينين فعينين الدولة فهاد اللحظات ولكن ما كتحملهومش الدولة فاش كيخرجو يطالبو بحقوقهم بحال لي دارو فالحسيمة. وزاد كملها وجملها، قالك كان كيتفرج فالمنتخب، فإذا به كيتفكر ناصر الزفزافي. ياااك أبا؟؟
هادا كامل إصرار على خلق رمز إعلامي لمنطقة الريف وإعطائو شرعية فالوقت لي ما قدم حتى شي حاجة لهاد لبلاد. تا كي درتي ليها؟؟
إيوا تعالا ليا يا وليدي عليك كنقلب وسمع ليا مزياااان، ندمك على النهار لي فكرتي فيه تجبد ريافة بهاد المنطق الخامج الموسخ. ومادام طحتي مع ريفي لي هو أنا بوغطاط المغربي، أجي يا وليدي نعاود ليك الترابي ونوريك شكون يكونو ريافة ديال بصح.
أولا يا وليدي يا بوبكي، بغيت نفكرك بلي ناصر الزفزافي (لي صراحة ما يشرفنيش يتقال أنه ريفي وتحاول ترجع منو رمز) لي تفكرتيه بديك الرومانسية ونتا كتتفرج فسيدك سفيان أمرابط واحد من أسود الريف لي كيموتو على بلادهم وما عمر غراتهم الجنسية الأوروبية، ولي حط الرية ديالو فالتيران وظهرو معطوب باش يمرمد ليا الصبليون كيفا دخل فيهم خوه من قبل ف 2018 طول وعرض
فالمقابل ديال هاد الرجال، هاد الزفزافي لي جاتك النفس عليه، راه نهار خرج كيف كتدعي نتا باش يطالب بالحقوق، راه هو لي قال بلي الاستعمار الإسباني أرحم من الاستعمار المغربي. يعني هو شايف بلي الريف ماشي جزء من المغرب وباغي يعاودو الصبليون يستعمرونا. إذا نتا نسيتي، أنا والملايين ديال المغاربة عمرهم ينساوها.
ناصر الزفزافي لي تفكرتيه ونتا كتفرج فالمنتخب الوطني هو لي قال "هاد الدولة غادي نسعر يماها" (وقالها بالريفية: "أذسموزاغ يماس الدولة يا") وبلي غادي يوصل الأمر لإنزال الدبابات والأباتشي، وهو لي حرّض المرتزقة لي كانو معاه باش شعلو العافية فإقامة البوليس. وإذا نتا نسيتي، راه أنا وملايين المغاربة عمرنا ننساوها.
الزفزافي لي باغي تقلي بيه السم في عز فرحة المغاربة، بّاه لي كتقيلو تلحسو ليه الكابة ب "عيزي احمد" وأب الصنديد وما نعرف شنو، هو لي كان كيمشي يسعى أوروبا ويوقف وسط مرتزقة أوروبا وتجار المخدرات أمثال سعيد شعو مول حركة 18 شتنبر، ووسط هادوك لي بغاو يطيحو الذل على ريافة وحااااشا واش يكونو ريافة، ولي كان كيطلب منهم الدعم هما لي كانو كينظمو وقفات كيحرقو فيها العلم الوطني ويرفعو علم الجمهورية المزعومة.
وواحد منهم لي عايش فألمانيا المعروف ب "يوبا الغديوي" وعلى خطى ناصر الزفزافي، كان كيتمنى تربح اسبانيا والبرتغال ضد المغرب، ونهار وما طال يشيت للنظام الجزائري. إذا نتا يا وليدي يا بوبكي ناسي أو متجاهل هادشي، فأنا والملايين المغاربة عمرنا نساو هادشي.
نتا لي جبدتي على فمك ريافة ونتا كتحاول بكل خبث وقلة النية أنك تصورهم على أنهم محكورين ومنبوذين بحالا زعما ما محسوبينش على هاد لبلاد وبحالا الدولة كارهة ديك المنطقة وولاد ديك المنطقة وكأنها كتتعامل معاهم بلي ماشي مغاربة، أجي نعطيك دروس على شكون يكون الريفي وكيفاش كتعول عليهم الدولة فجميع القطاعات، لوفائهم في خدمة الوطن، أما لي كيخرجو لينا من الجنب، فراه المثل كيقول، كل دار فيها كيدار.
الريفي ديال بصح يا وليدي يا بوبكي وهادي عمرك تفهمها ولا تحس بها. هو لي يعطي دمو وروحو على بلادو. الريفي هو لي الولاء ديال الأول والأخير للوطن ديالو واخا يكون لي يكون. الريفي الحقيقي هو لي عمرو يخون أو يغدر أو يمارس تاعطايت للبراني. والريفي الحقيقي يا وليدي هو لي كيعبر على انتماءو لبلادو بالخدمة وبالدراع. كيحفر بيديه ورجليه وسنانو باش يوصل ويشرف بلادو أحسن تشريف، سواء فالداخل أو فالخارج. الريفي الحقيقي فاش كيصيفطوه واليديه يتغرب، كيمشي يدمر باش يرجع راجل ويشرف بلادو أحسن تشريف وهو لي عمرو تلاقاه كيقول أش عطاتني لبلاد، ولكن لي كيقول أش غادي نعطي لهاد لبلاد. الريفي الحقيقي لي يموت علا بلادو، هو لي واخا يتولد فوق سطح القمر، نهار يقول ليه المغرب محتاجك، يجي كيجري بلا حساب وبلا تخميم.
وحيت ضيعتي عليا الفرحة لي كنت فرحان بها ونااااشط مع راسي، حلفت بحلوفي حتى نجبد ليك ريافة لي تهكمتي عليهم فالمنتخب الوطني المغربي واحد بواحد ونخلي تصريحاتهم هي لي تعاود ليك الترابي فشنو معنى الوطنية، ومعنى الولاء للوطن، ولي كانو هما بصح رموز ديال العطاء فأرض الميدان قبل ما يكونو رموز إعلامية لي كيهضر عليهم اليوم العالم كامل وكتتهافت عليهم كبريات النوادي.
حب الوطن لي صعيب على أمثالك تفهمو، حين نتا وأمثالك كتتعاملو مع الوطن بمنطق الامتيازات. نهار كانت البزولة في فمك وكنتي داخل خارج للديوان الملكي وخدام مع مصطفى التراب، وكنتي طامع فما كثر، كانت لبلاد ديك الساعة زوينة والملك زوين والمخزن حنين. ونهار ما بقاش هادشي بديتي فتاعطايت ووليتي من الرواد ديالها.
سليم أملاح
نبدا معاك بسليم أملاح ولد الناظور، لي تولد فبلجيكا وعايش تما، كان سولو واحد الصحافي بلجيكي بواحد الطريقة متهكمة بحال لي درتي نتا، قاليه واش ختاريتي تلعب مع المنتخب الوطني المغربي حيت حسيتي بلي ماغاديش تكون عندك بلاصة فالمنتخب البلجيكي. وهو يجاوبو وقاليه أنا اختياري للمنتخب المغربي نابع من القلب واختياري ليه كان مفيكسي فاش كنت صغير. يعني الوطن بالنسبة ليه ماشي ديال المساومة وشي حاجة لي كاينة فالدم من نهار كيحل عينيه وكيعرف أنه مغربي واخا يخلاق فالمريخ.
منير المحمدي
أجي تاني عند حارس المرمى منير المحمدي ولد الناظور لي خلاق فمليلية، لي كان السد المنيع فالماتش ديال بلجيكا ودار مباراة أسطورية، خلات المغاربة كاملين يهزو راية لبلاد عاااالية، ماشي غير حيت ربح وإنما حيت هزم ثاني أحسن منتخب فالعالم وماشي فمباراة ودية وإنما فنهائيات كأس العالم.
مقطع إذا فيك شويييييية ديال النفس على لبلاد غادي يخليك تدمع وتتبورش ونتا كتسمع كيفاش هاد السيد كيحكي بتأثر كبير نهار عيطو عليه يلعب فالمنتخب الوطني المغربي. والشعور لي حس به وهو كيستقبل الاتصال ديال خالد فوهامي لي كان المدرب ديالو فالمنتخب.
أجي تسمع على وذنيك باش كان كيحس به فاش كيلعب مع المنتخب المغربي مقارنة مع فاش كيلعب مع فراقي خرين. واخا الفيديو بالريفية ولكن كاين الترجمة لتحت.
ومسك الختام مع الإخوة أمرابط
طبعا الإخوة أمرابط ولاد بن طيب إقليم الناظور، مايحتاجش نحكي ليك عليهم وعلى القتالية باش كيلعبو على ود حاجة وحدة لا غير. وهي العلم المغربي. سواء نور الدين أو سفيان كتوصل بيهم للعظم وكيكونو فقمة العيا والإصابة، ولكن وتقول واش يطيحو أو يحطو السلاح. المغرب أولا وأخيرا.
وهادا أول تصريح لسفيان أمرابط كيعاود فيه كيفاش قرر يختار المنتخب المغربي عوض المنتخب الهولندي لي تولد فيها وعاش فيها.
الملاحظ أن كاع هاد اللعابة سواء من أصول ريفية أو أي منطقة خرى فالمغرب، فاش كيهضرو على الوطنية وعلى الولاء للوطن والإحساس بالانتماء، كلهم كيهضرو على شي حاجة سميتها "التبووووريييشة" لي أكيد عمرك حسيتي بها يا بوبكر لا نتا ولا غيرك من العطاية، حيت كيف قلت، الولاء للوطن عندكم مرتبط بامتيازات، والتبوريشة ما كتجيكم إلا فاش كتجيكم ديك الامتيازات.
أما نور الدين أمرابط البارح (11 دجنبر 2022) فقناة الكاس القطرية قال ليهم: "أمر رائع أن تكون مغربيا وكلنا نحب هذا العلم" وباس العلم الوطني.
فاش جبدو ليه ديك القضية ديال حكا منتخب ديال الجالية وبلي اللعابة ديال المنتخب تدربو وتكونو فالخارج وماشي فالمغرب. باش جاوبهم يا لي كيحسب راسو من النخبة ديال آخر زمن؟؟
قال ليهم هادا ماشي كلام صحيح. قاليهم أولا حنا كلنا مغاربة، نتولدو فالمغرب ولا فالخارج، بلادنا هي الأولى. قاليهم أنا لي كنهضر معاك عندي باسبور مغربي وباسبور هولندي ولكن نهار كنختارو راه كنختارو لبلاد. وكاع المغاربة لي فالمنتخب كلهم كيفكرو بنفس الطريقة وكولشي كيموت ويتقاتل على البلاد.
وزاد قاليه بخصوص ديك القضية ديال التكوين، داكشي ماشي صحيح، حيت المغرب عندو أكادية محمد السادس لكرة القدم، لي كتعتبر من أحسن الأكاديميات ديال التكوين فكرة القدم فالعالم. وقال ليهم بلي داكشي لي تدار فالمغرب فالكرة في عهد فوزي لقجع كان خيالي ورائع. ونخليك المقطع ديال الفيديو باش تسمع على وذنيك مزييياااان.
وهادشي كاااامل مجرد أمثلة كتخص كرة القدم وكتخص بالضبط هاد المنتخب الوطني لي كنعيشو معاه هاد المجد التاريخي، أما إذا جينا نهضرو على ناس خرين قبل من هادو فمنتخبات سابقة خلااااص. وإذا جبدت ليك مجالات رياضية خرى غادي تزيد تفقص، أما إذا هضرت لك على ريافة لي فالمغرب لي هازين شعار: "المغرب أولا دائما وأبدا"، كيفاش كيخدمو بلادهم بالمعقول وبالنية من الديوان الملكي ونتا هابط، غادي يسكت ليك القلب.
هاكا يكونو ولاد المغرب لمأصلين، من جميع ربوع المملكة الشريفة. وهادشي لي كيقدموه لي عندهم ولاء للوطن أولا. ولكن شنو قدم هاداك لي تفكرتيه ونتا كتفرج فالمنتخب؟ من غير أنه كان باغي يشتت لبلاد.
سيييير أ بابا... ولكن ماشي سير لي كيقولو المغاربة للركراكي، هادي واحد سير وحدة خراااا، بلا ما نكملها... الله يخليها قاعدة فيكم، ولي ما حب هاد لبلاد تعما عينو.