صورْتي فْالسْماءْ وصورْتَكْ فْالتْرابْ

(ولقد صدَّق عليهم إبليس ظَنَّه فاتبعوه إلا قليلا من المؤمنين) سبأ 20
هذا أنا الظَّاهَرْ
صورَةْ مَكْمولَةْ
الخافي مْنِّي شَلاَّ
مَنْ الطِّينَةْ الرْفيعَة
صْنَعْني العَلِيْ العالَمْ
وفْكُلْ وادْ مْنِّي زْرَعْ نْعايْمو غَلَّة
***
جَرَّتْ المْلاهي حْبَلْها
وعْلى وْتَدْ عُنْقي دارْ
شْعَلْ فِيَّ نارْ
مْضَوْية عْلى شْواكْ الزَّلَّة
قادْني الشِّيطانْ
في طْريقْ مَلْيانْ عْدارْ
اللْجامْ مَنْ الرِّيحْ
ولْبْرادَعْ فُوقْ الحافَةْ تْتْسَلَّى
طافْ بي فْدادَنْ
سْبولْها جْمارْ
مْوَرِّني الحْبوبْ
فْخْناشي مَنْ ضَحْكَةْ لْكْذوبْ
وعْبادْ تْدْرَسْ شَوْكْ الذْنوب حَفْيانَة
فْنْوادَرْ الغَفْلَة ...
طَمَّعْني بْخْيولْ هَرَّابَة
وكيسانْ طَرَّابَة
ومَلَّكنْي على اللِّيلْ والنْهارْ
ورَّاني فالشَّجْرَة غابَة
ومْناظَرْ خَلاَّبَة
وزْطَمْتْ فْالمْرايا مْشْوارْ
مَنْ لْخْيالْ صْنَعْ لي جَلاَّبَة
على قْدِّي بالعْبارْ
وَبلْغَةْ وسَلْهامْ مْرَصَّعْ بالكْتابَة
دَوَّزْ على عَيْنِيَّ ضْبابَة
وْوَرَّاني كُلْ سوقْ مَطْيارْ
كيسانْ ونَسْوانْ
ومَنْ كُلْ زينْ ويدانْ
ومْشيتْ فيها يا سيدي
وكْلِيتْ بِيدي
وزادَتْ بْلِيْتي وسالْ لْلعابْ
راسَمْ لي صورْتي فْالتْرابْ
والنَّارْ شَعَّالَةْ فْصَدْري
تَأكَلْ مَنْ حْبَلْ عُمْري
ما شَفْتْ شْتاءْ ولا بَرْد
ولا بابْ فْوَجْهي تْسَدْ
وصَلَّى بي وأَنا موراهْ
ولا نور بانْ فالجْباهْ
ومْلِّي شْبَعْتْ يا خونا فاللَّه
فَرَّشْ لي وغَطَّى
وقَرَّاني فْلْواحْ الشَّهَواتْ فينْ نُوطى
ومْلِّي مْلَّيْتْ و فَتَّحْتْ عِيني
لْقِيتْ حُفْرَةْ
يْسَمُّوها لْقْبَرْ
والحَفَّارْ سايِرْ يْعْبَرْ
وضْحَكْ الشِّيطانْ
وغْمَزْ صْحابوُ :
خْلِّوْا الفْقيه يْقَرِّيه ْوْجابوا
والنَّاس بََّكايَة
والطَّلْبَةْ مْعَلْييِنْ لْقْرايَةْ
ساعْتْها بْكيتْ وَحْدي
حتى بْكى لْحْجَرْ مْعايا
وقْرَيْتْ كْتابي وَحْدي
ما قْرا حْروفو حَدْ مْعايا
وبْكاتْ قْلامي
وجْراتْ بْما ْبقى مَنْ مْدادْ فْالدْوايا
وَسْدوني بْتْرابَكْ يا دَنْيا
وغَيَّبْ الظْلامْ كُلْ ما وَرَّاتْ المْرايا ..
ونادِيتْ بْلسانْ الحالْ :
تْبَعْ اللِّي كْلامو طاهَرْ
وادْ مَلْيانْ بالحَقّْ الزَّاهَرْ
سيدي وسيدَكْ المَرْسولْ
شْرَبْ مَنْ حَوْضْ المْحَجَّةْ و جولْ
رْجَعْ لْكْتابْ الله إلا ضاقَتْ بيكْ السْبولْ
نْوارو عَلاَّيَةْ
وطوفْها دَنْيا عَرْض وطولْ
حايِكْ بْيَضْ فالفْجَرْ سْتورْ
غَيْمَة هَطَّالَة خيرْها فْكُلْ الجْوايِهْ مَنْثورْ
طيرْ جْميلْ غَنَّايْ لْكُلْ مومَنْ مَبْشورْ
غُصْنْ عْنابْ طابْ وتْدَلّى
زَرْعْ رْطيبْ طابْ وعَلَّى
مَوْجْ الخيرْ ضْرَبْ فْشْطوطْ الأَمانْ
عِبْرَةْ لْلإِنْسانْ ولْبْحورو وَلَّى ..
فبراير 2000
د محمد بازي