أبو حفص.. طيح عليا الضيم السيد ديال الاحصاء...فكرني في الأيام السوداء اقسم بالله

كتب الشيخ محمد عبد الوهاب رفيقي، المعروف بأبو حفص على حسابه الخاص بالفيسبوك "اليوم جا عندي السيد ديال الإحصاء...المهم قلت لأسامة دخلو للبيت...الإحصاء راه واجب وطني و التعاون مع موظف الإحصاء واجب( هادشي لي قال لينا خطيب الجمعة اقسيييم بالله)"...

أبو حفص أضاف في تعليقه "دخلت عندو..شاب وسيم لطيف واخا طلع فوق الزربية بسبرديلتو ماشي مشكل...ف وجه سي لحليمي و وجه السيدة ميركل ..لان السبرديلة أديداس فكراتني بسبرديلتي فاش كنت تنقرا ف ثانوية الواحة"....

وأردف أبو حفص "المهم بدا تيسول فيا سميتك سميت مراتك ولادك....طيح عليا الضيم...فكرني بالايام السوداء لا أعادها الله ديال سميتك سميت باك سميت مك..واش عارف انك متهم بجريمة قتل 34 واحد و محاولة القتل و الجرح العمد و إحداث عاهة و تفجير فندق فرح و كازا اسبانا و المقبرة اليهودية....تخلعت أنا تزعزعت....الله يهديك اسي القاضي واش معايا تتكلم...أنا را الكبش ديال عيد الأضحى تنذبحو غي بلكشايف ...شويا يقول ليا نتا لي فجرتي التويم و كنتي السبب ف الحرب الأهلية د رواندا"...

وأضاف أبو حفص "معليناش نرجعو لمول الاحصاء.....أسئلة عادية كلشي مزيان...جوج د الاسئلة لي استفزوني شويا ولكن بردت:
سولني فين تولد ولدك (حفص) قلت ليه المدينة المنورة...قال لي: فين جات المدينة المنورة...بقيييت تنشوف فيه..كنت غانقول ليه: ف استراليا حدا لوكسمبورغ متكية على زيمبابوي و مقابلة مع الصين الشرقية....و أنا نحشم وسكت حتا فهمها على خاطرو...

قال لي بنتك أروى شحال عندها من عام...قلت ليه: عام...قال لي فين تتقرا...بقيت تنشوووف فيه تاني...كنت غانقول ليه: الصراحة هي دابا محتارة واش دير كلاس بريباراتوار( أقسام تحضيرية) و لا تلتحق بجامعة الأخوين و ان كنت انا تنفضل دير ميدسين مع عندي شباب بزاف معرفة ف الميدسين و عزيزة عليهوم يالاه تولف دغيا....

أبو حفص ختم أن "الحاصول السيد ناض فحالو وخلاني تنشوف ف هاد الاسئلة الغريبة و خصوصا ف الطبايع ديال سبرديلة لي خلا فوق الزربية...المهم فاش يقولو المغرب را فيه ربعين مليون نسمة را حتا أنا داخل فيهوم حيت أول مرة تنعقل على راسي شاركت ف الإحصاء".