اللي حرتوه كابرانات دزاير دكو ليهم مدربهم اللي ربح كأس افريقية: المغاربة تهلاو فيا ما عمري حسيت براسي براني وانتما ولاد بلادي حكرتوني وسبيتوني أنا وأمي

أكد الناخب الجزائر السابق والمدرب الحالي لاتحاد العاصمة الجزائري عبد الحق بنشيخة اللي سبق له درب فرق مغربية، أن الاحترام والتهلو اللي لقاهم فالمغرب من طرف المغاربة، ما لقاهمش فبلادو الجزائر وولاد بلادو الجزائريين، اللي عيروه وسبو له الام ديالو.
وخلال حوار له مع واحدة من القنوات الجزائرية قال عبد الحق بنشيخة: "كتضرني بزاف حيث تحكرت فبلادي الجزائر، ملي مشيت دربت فالمغرب عمرني ننسا خيرهم ومعمرني تسبيت فشي تيران مغربي ولا نقص مني شي واحد حيث انا جزائري".
وكمل بنشيخة وقال: "المغاربة كيحتارموني وكيحشمو يتكلمو فالجزائر، ولا يقولو عليا هذا راه جزائري وفاش رجعت لبلادي من بعد 10 سنين، أول حاجة سمعتها فالتيرانات الجزائرية هي السبان اللي سبوني وأمي عيروها ليا وهي فقبرها انا راني تحكرت فبلادي ومن ولاد بلادي ولكن المغاربة تهلاو فيا ".
وكيحتفظ عبد الحق بنشيخة بعلاقات زوينة مع المغاربة وراه درب بزاف ديال الفرق المغربية منها الرجاء الرياضي والدفاع الحسني الجديدي، واتحاد طنجة، وعندو ولدو كيقرا فكازا ومشجع لفريق الرجاء الرياضي، وهو غير مثال واحد من بزاف د الرياضيين الجزائريين اللي فضلوا يلعبو أو يدربو فالمغرب.