نايضة ديال بصح فالدوري الإسباني لكرة القدم، بسبب العنصرية اللي كان ضحيتها النجم البرازيلي فينيسيوس جونيور لاعب ريال مدريد من عند جماهير فالنسيا خلال الماتش بين الفريقين، وردت الفعل ديالو اللي كانت سبب بأنه يتطرد من المباراة. الدولي المغربي أشرف حكيمي نجم باريس سان جيرمان وصاحب فينيسيوس حيث لعب معه فريال مدريد، ساندو ونشر تصويرتو على أنستغرام وقاله: "حنا معك أخويا فينيسيوس". أسطورة كرة القدم البرازيلية رونالدو والنجم السابق لريال مدريد والبرصا وفرق أخرى كبيرة بأوروبا بحال انتر وميلان الطاليانين، ومول نادي بلد الوليد الإسباني، قال حتى هو فانتستغرام: "حلقة جديدة من العنصرية فالليكا، حتى لين؟ طالما كاين إفلات من العقاب وتواطؤا راه غتكون عنصرية، وماشي معقول أن الحكام والمسؤولين ما يصدروش شي قرار والمشجعين يصفقوا لهاد التخربيق وباركا، فينيسيوس اعتمد علي فالمعركة ديالك راه حرب ديالنا كاملين". رئيس البرازيل لويس إيناسيو لولا دا سيافا، حتى هو دخل على خط حادث العنصرية اللي تعرض له فينيسيوس بإسبانيا وقال فمؤتمر صحافي: "كنتضامن مع لاعبنا البرازيلي، هذا راه ولد صغير فقير نجح فحياتو وصبح من أحسن لاعبين كرة القدم بالعالم، وهو أحسن لاعب بريال مدريد، وتعرض للهجوم فالتيرانات اللي لعب فيها، راه ضروري يتدخل الفيفا ورابطة الدوري الإسباني، وبإجراءات حقيقية حيث ما يمكنش السماح للفاشية والعنصرية باش تسيطر على الملاعب". هذا الحادث العنصري اللي كينضاف لحوادث عنصرية كثيرة كتعرفها ملاعب إسبانيا، خلا المغاربة يتعاطفو بزاف مع النجم البرازيلي فينيسيوس جونيور، واللي كان سبق له جا للرباط لعب مع ريال مدريد كأس العالم للأندية وبعدها جا مع البرازيل لعب أمام المنتخب المغربي ماتش أميكال بطنجة، ورحبو به المغاربة بزاف وهو كان فرحان حيث استقبلاتو الجماهير المغربية وكان ناشط معها بزاف وكل مرة كيحط شي سطوري كيشكر فيه المغرب والجمهور المغربي. وخلف حادث العنصرية اللي تعرض لها فينيسيوس جونيور فالتيرانات الإسبانية، مخاوف كبيرة عند الجماهير المغربية من تأثير هاد الأحداث سلبيا على ملف الترشح الثلاثي لتنظيم كأس العالم 2030، اللي فيه المغرب مع إسبانيا والبرتغال، حيث ماشي من المعقول أن المسؤولين يقادو الملف على حقو وطريقو وتجي جماهير بإسبانيا ما عندهاش وعي تضرب كلشي فالزيرو.
